İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 398 Hüküm no: 384 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acı Kirkor v. Karabet’in ipekçi gediğini Parsih v. Panos’a sattığı Kazzâz gediğine sûret i‘tâsı Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kâin kazzâz esnâfından Acı Kirkor v. Karabet nâm zimmî meclis-i şer‘-i enverde Parsih v. Panos zimmî muvâcehesinde kazzâzlar kethüdâsı Abdüllatif Ağa ve Yiğitbaşı Molla Mehmed ile kazzâz ustalarından diğer Kirkor ve Agob zimmîler hâzır oldukları hâlde mahmiye-i mezbûrede bezzâzistân-ı atîk kurbünde Çakır Ağa sûkunda kâin ma‘lûmü’l-hudûd bir kepenk bir bâb kazzâz dükkânı derûnunda mevcûde akd-i âti’z-zikrin sudûruna değin bir kıt‘a sûret mantûkunca yedimde mâlım ve mülküm olan beyne’l-hiref bir gedik tâ‘bir olunur kazzâz âlât-ı lâzıme-i ma‘lûmemi tarafeynden bi’l-îcâb bâtten ve sahîhan bi-safkatin vâhidetin beş bin guruş semen-i makbûza mesfûr Parsih zimmîye bey‘ ve temlîk ve teslîm eylediğimde ol dahi yedimden iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d zikr olunan bir gedik tâ‘bir olunur âlât-ı lâzıme-i ma‘lûmede benim kat‘â alâka ve medhalim kalmayup mesfûr Parsih zimmînin mülk[ü] olmuşdur deyü ba‘de’l-ikrâr ve’t-tasdîk zikr olunan bir kepenk dükkân derûnunda mevcûde bir gedik tâ‘bir olunur âlât-ı lâzıme-i ma‘lûmenin kaleminde mesfûr Acı Kirkor zimmî üzerinde olan kayd-ı atîki ref‘ ve terkīn ve atîk sûreti battâlda hıfz olunarak mersûm Parsih zimmî ismine kayd-birle şürûtu mûcebince yedine sûret i‘tâ buyrulmak bâbında istid‘â-yı inâyet eyledikleri İstanbul Mahkemesi’nden [huzûr-ı âlîlerine i‘lâm olundu.] Fî 27 Za sene [1]237