İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 399 Hüküm no: 385 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanes v. İstefan’ın, Ahmed Ağa b. Mustafa aleyhine açtığı alacak davasında iddiasını ispat edemediğinden muarazadan men edildiği Arz odasında 5.000 guruş mu‘ârazadan men‘ Ma‘rûz[-ı dâ‘î-i devlet-i aliyyeleridir ki] Sarraf tâifesinden Avanes v. İstefan nâm zimmî Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde Öziçe kalesi binâ emini Süleyman Ağa’nın etbâ‘ından Ahmed Ağa b. Mustafa nâm kimesne muvâcehesinde bin iki yüz otuz beş senesi hılâlinde merkūm Ahmed Ağa’nın bi-şartü’r-rücû‘ emriyle âhardan iştirâ ve kendüye teslîm eylediğim ber-mûceb-i defter-i müfredât eşyâ-i ma‘lûme esmânından ve kendüye bi’d-defa‘ât ikrâz ve teslîm eylediğim min-haysü’l-mecmû‘ altı bin altı yüz yirmi dört guruşun sekiz yüz elli guruşunu bir def‘a ve yedi yüz yetmiş dört guruşunu bir def‘a ki cem‘an bin altı yüz yirmi dört guruşu bana edâ ve teslîm ben dahi kabz etmemle ciheteyn-i merkūmeteynden zimmetinde bâkī beş bin guruş alacak hakkım olmağla hâlâ taleb ederim deyü ba‘de’d-da‘vâ ve’l-istintak mezbûr Ahmed Ağa cevâbında müdde‘î-i mesfûrun da‘vâ-yı mezkûresini külliyen inkârından mâ‘adâ mersûm Avanes zimmî hizmetinde olduğum Süleyman Ağa’nın sarrafı olup ben dahi merkūmun yanına gidecek olduğumda bin iki yüz otuz altı senesi Zilhiccesinin yirmi beşinci gününde mezbûr Süleyman Ağa ile olan ahz u i‘tâlarının hesâbını Âsitâne-i aliyyede umûrunu rü’yet eden gāib ani’l-meclis es-Seyyid Hâfız Salih Nazif Efendi nâm kimesne rü’yet eylediklerinde ben dahi benim zimmetimde alacak hakkın var mıdır deyü mesfûra suâl etmemle mesfûr dahi cevâbında târih-i mezkûra gelince senin zimmetinde bir akçe ve bir habbe alacak hakkım yokdur deyü muvâcehemde huzûr-ı Müslimînde ikrâr ve işhâd dahi edüp ol vechile müdde‘î-i mesfûr Sarraf Avanes zimmînin da‘vâ-yı mezkûresinden zimmetim berîedir deyü ba‘de’d-def‘ ve’l-inkâr mezbûr Ahmed Ağa def‘-i meşrûhunu lede’t-tezkiye makbûlü’ş-şehâde idükleri ihbâr olunan Ahmed Ağa b. Mustafa ve Şerbetçioğlu diğer Ahmed Ağa b. Ahmed nâm kimesneler şehâdetleriyle bi’l-muvâcehe ber-nehc-i şer‘î ba‘de’l-isbât mûcebiyle müdde‘î-i mesfûr Sarraf Avanes zimmî da‘vâ-yı mezkûresiyle mezbûr Ahmed Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden huzûr [-ı âlîlerine i‘lâm olundu.] Fî 25 Za sene [1]237