İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 400 Hüküm no: 387 Orijinal metin no: [80a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Ahmed’in evine sonradan ilave ettiği tahta perdeyi kaldıracağını taahhüt ettiği Tahta perde kat‘ına ta‘ahhüd ile keşf Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen zikri câ‘î husûsun mahallinde lede’l-mu‘âyene keşf ve tahkīki içün savb-ı şer‘-i enverden me’zûnen irsâl olunan Kâtib Mehmed Hidâyetullah Efendi hâssa mimarı hulefâsından es-Seyyid Abdulkādir ve diğer Abdulkādir Halîfeler ile İstanbul’da Vezîr Hanı kurbünde Molla Fenârî Mahallesinde tarîk-i hasda vaki‘ zîr-i nezâret-i dâ‘îlerinde olan evkāfdan ashâb-ı hayrâtdan merhûm Hoca Hamza Vakfı müsakkafâtından ma‘lûmü’l-hudûd münâza‘un-fîh olan bir bâb menzile varup cerîdede mazbûtü’l-esâmî Müslimîn huzûrlarında akd-i meclis-i şer‘-i Nebevî ettikte menzil-i merkūm şehriye otuz beş akçe icâre-i müeccele ile bâ-temessük-ı mütevellî bi’l-münâsafa iştirâken mutasarrıflar olan sâhib-i arzuhâl sâbıkā duhân gümrüğü emini el-Hâc Mustafa Ağa Aşçıbaşısı Mehmed Ağa b. Ahmed ile zevcesi mu‘arrefetü’z-zât Emine bt. Abdullah nâm Hatun meclis-i ma‘kūd-ı mezkûrda menzil-i merkūm karşısında kâin yine vakf-ı mezbûrdan ma‘lûmü’l-hudûd bir bâb menzile şehriye yirmi akçe icâre-i müeccele ile bâ-temessük-ı mütevellî bi’l-icâreteyn mutasarrıf olan derûn-ı arzuhâlde mezkûrü’l-ism Serdengeçti ağavâtından Kahveci Mehmed Ağa b. Hüseyin nâm kimesne muvâcehesinde vakf-ı mezbûrun mütevellîsi es-Seyyid Mehmed Sâdık Efendi b. Abdullah’ın zevcesi ve tarafından vekîl-i mürseli zâtı mu‘arrefe Aliye bt. Mehmed Emin nâm hatun hâzıra olduğu hâlde bizim ber-vech-i iştirâk tasarrufumuzda olup derûnunda akd-i meclis-i şer‘-i âlî olunan işbu menzilimizin pencerelerinden mezbûr Mehmed Ağa’nın menzilinin makarr-ı nisvân olan kuyu ve matbahına havâle ve nezâret olunduğuna binâen havâlesini def‘ içün işbu mu‘âyene olunan tûlen dokuz zirâ‘ ve kadden iki buçuk zirâ‘ taş duvarı üzerine kadden dört zirâ‘ yirmi bir parmak tahta perde mukaddemâ binâ ve inşâ edüp zikr olunan tahta perde binâsından nâşî bizim menzil-i mezkûrumuzun matbah ve ocağı karanlık ve havasına dahi mâni‘ olacağı zâhir olduğundan mâ‘adâ menzil-i mezkûrun tarîk-i has üzerine tansîfen nısf zirâ‘ olan bayrak şehnişîne kanâ‘at etmeyüp şehnişîn-i merkūmdan bu esnâda mimârân-ı mezbûrân mesâhalarıyla [80b] tansîfen on dört parmak şehnişîni olup ol vechile iki parmak kadîminden mütecâviz binâ ihdâs etmekle mârru’z--zikr tahta perdeyi bi’l-külliye ref‘ ve şehnişîn-i mezbûru ke’l-evvel binâya mezbûr Mehmed Ağa’ya tenbîh olunmak matlûbumdur deyü da‘vâya tasaddî etmişdik el-hâletü hâzihî muslihûn tavassutuyla beynimiz tevfîk ve ıslâh olunup biz ber-vech-i muharrer tasaddî eylediğimiz şehnişîn-i mezkûrun ziyâde binâ ve ihdâs eylediği iki parmak mahalli nizâ‘ından meccânen fâriğler olup mezbûr Mehmed Ağa dahi zikr olunan tahta perdenin mimârân-ı mezbûrân mesâhalarıyla kadden yirmi bir parmak mahallini rızâsıyla kat‘â ta‘ahhüd edüp bu vechile kat‘-ı münâza‘a eyledik deyü takrîr ve tasdîklerini kâtib-i mezbûr mahallinde tahrîr ve ma‘an meb‘ûs ümenâ-i şer‘le meclis-i şer‘a gelüp alâ-vukū‘ihi inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî 28 Za sene [12]37