İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 412 Hüküm no: 397 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Isparta’da Hacı Ahmed ve Yusuf Ağa Câmisi vakıflarının tevliyetinin İbrahim b. Hüseyin’e tevcihi Isparta’da el-Hâc Ahmed ve Yusuf Ağa Câmi‘leri tevliyeti tevcîhi Mukābele şüd Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen işbu arzuhâl ve derkenâra nazar olundukta Isparta kazâsına tâbi‘ Sav karyesinde vâki‘ merhûm Dalboyun oğlu el-Hâc Ahmed Câmi‘-i şerîf ve mekteb-i münîfi vakfının yevmî iki akçe vazîfe ile tevliyeti es-Seyyid el-Hâc Mehmed v. kebîr es-Seyyid Mustafa’nın ve Isparta’da Karaağaç Mahallesi’nde vâki‘ merhûm Yusuf Ağa Câmi‘-i şerîf ve mekteb-i münîfi vakfının yevmî on akçe vazîfe ile tevliyeti merkūm es-Seyyid el-Hâc Mehmed v. kebîr es-Seyyid Mustafa ile Âişe duhter-i kebîre es-Seyyid el-Hâc Mustafa’nın münâsafaten bâ-berât-ı âlîşân üzerlerinde ve vâkıfân-ı mûmâ-ileyhimâdan merhûm Dalboyun oğlu el-Hâc Ahmed Ağa Vakfı’nın sarâhaten vakfiyesi kaydı bulunmayıp ancak merhûm-ı mezbûr Yusuf Ağa Vakfı’nın Küçük Evkāf muhâsebesinde mukayyed vakfiye-i ma‘mûlün-bihâsında vakf-ı merkūma vâkıf hayatda oldukça mutasarrıf olup cihet-i tevliyet on akçe ola bâkī kalan icâre-i mezbûr Dalboyunoğlu el-Hâc Ahmed’in kazâ-i mezbûrda vâki‘ hamamında vakf-ı merkūm Yusuf Ağa’nın müceddeden icrâ eylediği su yolunun ta‘mîrine sarf oluna ve ba‘de vefâtihi evlâd-ı evlâd-ı evlâdının kebîr ve erşedi mütevellî olup ta‘yîn olunan vezâyifi verüp ve on akçe cihet-i tevliyeti alıp mâ-fazlayı zikr olunan su yolunun ta‘mîrine harc edüp batnen ba‘de batnin ve karnen ba‘de karnin bu minvâl üzere tevliyete mutasarrıf olalar deyü şart ve ta‘yîn eylediği mefhûm-ı derkenârdan ve vakfeyn-i merkūmeteyn tevliyetlerine mezbûr es-Seyyid el-Hâc Mehmed ile kız karındaşı sâhib-i arzuhâl es-Seyyid İbrahim’in vâlidesi Âişe veledey es-Seyyid el-Hâc Mustafa münâsafaten ekber evlâd-ı vâkıf olarak mutasarrıflar iken mezbûre Âişe fevt oldukda nısf hissesi batn-ı evvelde mevcûd ve ekber evlâd-ı vâkıfdan karındaşı mezbûr es-Seyyid el-Hâc Mehmed’e intikāl etmekle ol vechile tevliyet-i merkūmenin nısfına bâ-berât mezbûr es-Seyyid el-Hâc Mehmed mutasarrıf olup ba‘dehû mezbûr es-Seyyid el-Hâc Mehmed dahi fevt oldukda tevliyet-i mezkûre mahlûle olmağın tevliyet-i merkūme batn-ı evvelde mevcûd ve ekber ve erşed evlâd-ı vâkıfdan olmağla kendüye tevcîh buyrulmak bâbında sâhib-i arzuhâl mezbûr es-Seyyid İbrahim b. el-Hâc Hüseyin istid‘â-yı inâyet eylediği meâl-i arzuhâlden müstebân olup lâkin derkenâr mûcebince mezbûr Dalboyun oğlu el-Hâc Ahmed Vakfı’nın tevliyeti bâ-berât-ı âlîşân müstakillen ve merkūm Yusuf Ağa vakfının tevliyeti yine mezbûr es-Seyyid el-Hâc Mehmed ile kız karındaşı olan sâhib-i arzuhâlin vâlidesi Âişe’nin iştirâken bâ-berât üzerlerinde iken fevt oldukda nısf-ı tevliyet-i merkūmeye mahlûlünden karındaşı mezbûr es-Seyyid el-Hâc Mehmed şart-ı vâkıf üzere bilâ-berât müstakillen mutasarrıf iken fevt olup tevliyeteyn-i merkūmeteyn mahlûle ve şart-ı vâkıf üzere vâkıfân-ı merkūmânın evlâd ve evlâd-ı evlâdından olup ve batn-ı evvelde ekber ve erşed ve derecede kendüye müsâvî ekber ve erşed olmayup müstakillen tevliyet-i merkūmeteyne müstehak olduğunu mezbûr es-Seyyid İbrahim mahmiye-i İstanbul’da meclis-i şer‘de bi’n-nefs kendi takrîr ve şart-ı vâkıf üzere kendüye tevcîh buyrulmak bâbında istid‘â-yı inâyet etmeğin fi’l-hakīka mezbûr es-Seyyid İbrahim’in bi’l-cümle takrîr-i meşrûhu vâkı‘a mutâbık idüğü kazâ-i mezbûr ahâlîsinden es-Seyyid Mustafa Ağa b. es-Seyyid İbrahim ve es-Seyyid el-Hâc Süleyman Ağa b. es-Seyyid el-Hâc Mustafa nâm kimesneler ile mazbûtü’l-esâmî ve mevsûku’l-kelîm sâir bî-garaz Müslimîn bi’l-muvâcehe alâ-tarîkı’ş-şehâde haber vermeleriyle batn-ı evvelde ekber ve erşed evlâd-ı vâkıfeyn-i merkūmeteynden ve tevliyeteyn-i merkūmeteyne amel-i kadîm üzere müstehak idüğü zâhir olmağın bu sûretde batn-ı evvelde evlâd-ı vâkıfdan müstehık-ı âhar olmadığı takdîrce zikr olunan Dalboyunoğlu el-Hâc Ahmed Vakfı’nın vazîfe-i mersûmesiyle tevliyeti müstakillen hâlî müteveffâ-i mezbûr es-Seyyid el-Hâc Mehmed [83a] mahlûlünden ve mezbûr Yusuf Ağa Vakfı’nın vazîfe-i mersûmesiyle tevliyeti hâlî müteveffâ-i mezbûr es-Seyyid el-Hâc Mehmed ile vâlidesi müteveffât-ı mezbûre Âişe mahlûllerinden şart-ı vâkıf ve amel-i kadîm üzere batn-ı evvelde mevcûd ekber ve erşed evlâd-ı vâkıfeyn-i merkūmeteynden idüğü ihbâr olunan sâhib-i arzuhâl mezbûr es-Seyyid İbrahim b. el-Hâc Hüseyin’e tevcîh ve yedine berât-ı âlîşân sadaka ve ihsân buyrulmak bâbında fermân-ı âlîleri sudûru re’y-i sâmîlerine menût idüğü İstanbul Mahkemesi’nden huzûr [-ı âlîlerine i‘lâm olundu.] Fî 7 Z sene [1]237