İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 411 Hüküm no: 396 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cihânbeyli aşiretinin Anadolu’dan İstanbul’a getirdiği koyun ve keçilerin kasap esnafına dağıtımı Tevzî‘-i ağnâm Ma‘rûz[-ı dâ‘î-i devlet-i aliyyeleridir ki] Anadolu cânibinde Cihânbeyli aşîretinden bu def‘a Âsitâne-i aliyyeye sekiz yüz re’s ağnâm sevk ve tesyîr eden Hacı Pehlivan oğlu İbrahim Ağa ve yedi yüz re’s ağnâm celb eden Kösec Mustafa oğlu Hasan ve Şeyh Bozanlu aşîretinden yedi yüz elli re’s ağnâm sâhibi olan Mehmed Beyoğlu Tahir Bey tarafından vekîli Süleyman nâm kimesneler aşîretleri zâbıtı olan Mustafa Bey tarafından vekîli Ali Kethüdâ hâzır olduğu hâlde hâlâ kasablar kethüdâsı el-Hâc Hasan Ağa b. el-Hâc Osman muvâcehesinde Yedikule kasab ustalarından es-Seyyid el-Hâc İbrahim Ağa ve Hasan Ağa ve Mehmed Ağa ve Ahmed Ağa ve Mimarlı Hüseyin Ağa ve sâirleri kezâlik hâzır oldukları hâlde ber-vech-i muharrer Anadolu cânibinden Âsitâne-i aliyyeye sevk ve tesyîr eylediğimiz cem‘an iki bin ki yüz elli re’s Karaman ağnâmımızın bu def‘a sâdır olan fermân-ı âlişâna imtisâlen işbu târih-i i‘lâm senesi Zilhicceti’ş-şerîfesi gurresinden i‘tibâren lühûmunun beher vakıyyesini otuz ikişer ve kuyruklarının beher vakıyyesini otuz yedişer ve ağnâm sakatını onar ve keçi sakatını beşer paraya biz kassabâna vermek üzere ta‘ahhüd eylediğimizde yevm-i tevzî‘den kırk bir gün tamamında yaftalarımızı vermek ve hâlâ hâssa kasabbaşısı dergâh-ı âlî kapıcı başılarından Sa‘âdetlü es-Seyyid el-Hâc Mustafa Ağa’nın inzımâm-ı re’y ve ma‘rifetleriyle dört gün Anadolu celebânı ağnâmını ve dört gün Rumeli celebânı ağnâmını tevzî‘ etmek üzere kethüdâ-yı merkūm ve fîmâ ba‘d gurre-i merkūmeden i‘tibâren ağnâm-ı mezkûre lühûmunun beher vakıyyesini otuz beşer ve kuyruklarının beher vakıyyesini kırkar paraya ibâdullâha bey‘e ve iktizâ eden semenlerini vakt-i tevzî‘den yetmiş bir gün hitâmında bize edâya esnâf-ı hâzirûn-ı merkūmûn ta‘ahhüd eylediklerinde bizler dahi râzılar olduk deyü tarafeynin takrîr ve tasdîkleri ba‘de’t-tescîl İstanbul Mahkemesi’nden [huzûr-ı âlîlerine i‘lâm olundu.] Fî-selh-i Z sene [1]237