İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 414 Hüküm no: 399 Orijinal metin no: [83a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firari Kirkor v. Ohannes’in kilitli olan dükkânının açılarak içerisindeki eşyaların Maryem bt. Marker’e teslim edildiği Oda küşâdı Ma‘rûz[-ı dâ‘î-i devlet-i aliyyeleridir ki] İstanbul’da Mahmudpaşa kurbünde Sultan Odaları demekle meşhûr bir bâb hanın tabaka-i süflâsında kapıdan girerken sağ tarafda yedinci bir bâb odada müsteciren mütemekkin olan Erzurumî Poliçeci Kirkor v. Ohannes nâm zimmî bundan akdem oda-i merkūmeyi mukaffelen terk ve ta‘tîl-birle diyâr-ı âhara firâr ve gaybet-i münkatı‘a ile gāib ve mefkūd olmağla oda-i merkūme derûnunda mevcûde gedik tâ‘bir olunan âlât-ı lâzıme-i ma‘lûmenin müstakilleten mâlikesi şahsı mu‘arrefe Maryem bt. Marker Nasrâniye oda-i merkūmenin kuflu feth ve küşâd ve derûnunda mevcûde gāib-i mersûmun mâlı olup mütesâri‘ü’l-fesâd olan eşyası ma‘rifet-i şer‘le tahrîr ve semen-i misilleriyle âhara bey‘ olunup esmânı gāib-i mersûmun hâlî mütebeyyen oluncaya değin yedd-i emine vaz‘ ve oda-i merkūme kendüye teslîm olunmasını bâ-arzuhâl istid‘â etmekle ol bâbda sâdır olan fermân-ı âlîlerine imtisâlen kıbel-i şer‘den mürsel Kâtib es-Seyyid Ahmed Rızâ Efendi dâ‘îleri ma‘an meb‘ûs ümenâ-i şer‘den Çukadâr Abdullah Ağa b. Abdullah ve Muhzır Osman Çelebi b. Süleyman ile han-ı merkūma varup han-ı mezkûrun hancısı ve müstakillen icâre-i vâhide ile müsteciri Mehmed Ağa b. Halil ve Bağdâd tüccârından Hüseyin Ağa b. Hasan ve gāib-i mersûmun dâyinlerinden Bağdâdî İsmail Ağa b. el-Hâc Veliyüddin ve Şam-ı şerîf tüccârından Şumalı es-Seyyid Ahmed Ağa ve yine Şam-ı şerîf tüccârından diğer es-Seyyid Ahmed Ağa b. el-Hâc Mustafa ve Kayseriyeli Agob v. Biler ve Sarraf Ohannes v. Anparsum ve Bogasıcı Parsih v. Tatos ve sâirleri hâzır oldukları hâlde talebleriyle oda-i merkūmenin kuflunu feth ve küşâd ve derûnunda mevcûde gāib-i mersûmun mâlı tahrîr ve semen-i misilleriyle âhara bey‘ olunup esmânı gāib-i mersûmun hâlî mütebeyyin oluncaya değin kıbel-i şer‘den kayyım nasb olunan mezbûr hancı Mehmed Ağa yedine ve oda-i merkūme gediği mâlikesi mersûme Maryem Nasrâniyeye teslîm olunduğu İstanbul Mahkemesi’nden [huzûr-ı âlîlerine i‘lâm olundu.] Fî 6 Z sene [1]237