İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 415 Hüküm no: 400 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derohi bt. Anderyas ile Mircan v. Mircan’ın, Sarraf İstefan v. Hazer’e olan borçlarının tecil edildiği Kefâlet te’cîli Ma‘rûz[-ı dâ‘î-i devlet-i aliyyeleridir ki] Derûn-ı arzuhâlde mastûrü’l-ism olup bundan akdem hâlik olan Habbâz Kirkor v. Mircan zimmînin dâyinlerinden kapan-ı dakīkde mütemekkin sâhib-i arzuhâl Sarraf İstefan v. Hazer nâm zimmî bi’t-terâzî ve hânemizde ma‘kūd meclis-i şer‘-i enverde hâlik-i mesfûr Habbâz Kirkor zimmînin verese-i münhasırasından ve terekesine bi’l-verâse vaz‘-ı yedleri mütehakkık olan derûn-ı arzuhâlde isimleri mastûr zevce-i metrûkesi şahsı mu‘arrefe Derohi bt. Anderyas nâm Nasrâniye ile hâlik-i mersûmun sulbî kebîr oğlu Mircan zimmî muvâcehelerinde hâlik-i mesfûr Habbâz Kirkor zimmî zimmetinde cihet-i karz-ı şer‘îden ba‘de külli’l-hesâb alacak hakkım olan dokuz bin altı yüz guruşa sağlığında zevcesi mersûme Derohi Nasrâniye ile oğlu mesfûr Mircan zimmî bi’l-emr ve’l-kabûl ma‘an kefîl bi’l-mâl ve dâminler olduklarından sonra mersûm Kirkor zimmî hâlik olup mersûman dahi terekesinden ol mikdâr hisseye vâzı‘u’l-yed olmalarıyla meblağ-ı mekfûlün-bih merkūm dokuz bin altı yüz guruşdan zevce-i mersûmenin kefâleten hissesine iktizâ eden dört bin sekiz yüz guruşun iki bin sekiz yüz guruşunu zevce-i mersûme Derohi Nasrâniye ve mesfûr Mircan zimmînin kezâlik kefâleten hissesine isâbet eden dört bin sekiz yüz guruşun dört bin guruşunu mesfûr Mircan zimmîden her birinin yedlerinden ahz ü kabz ve istîfâ etmemle meblağ-ı mezbûrdan mersûma Derohi Nasrâniye zimmetinde bâkī hakkım olan iki bin guruşu ve kezâlik meblağ-ı merkūmdan mesfûr Mircan zimmî kezâlik zimmetinde bâkī hakkım olan sekiz yüz guruşu her biri hâlâ edâya kudretleri olmamağla her birini işbu târih-i i‘lâmdan bir sene tamamına değin rızâmla imhâl ve tehîr edüp fîmâ ba‘d meblağayn-ı merkūmeynden mâ‘adâ cemî‘ hukūk-ı şer‘iyye müte‘allika âmme-i da‘vâdan her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi eyledik deyü mesfûr Sarraf İstefan zimmînin eylediği takdîrini mesfûrandan her biri tasdîk ve meblağ-ı bâkī-i mezbûr iki bin guruş ber-vech-i muharrer zimmetinde deyni olduğunu zevce-i mersûme Derohi Nasrâniye ve meblağ-ı bâkī-i merkūm sekiz yüz guruş kezâlik zimmetinde deyni olduğunu mersûm Mircan zimmî ikrâr u i‘tirâf ve her biri meblağayn-ı merkūmeyni târih-i i‘lâmdan bir sene tamamında edâya ta‘ahhüd eyledikleri İstanbul Mahkemesi’nden [huzûr-ı âlîlerine i‘lâm olundu.] Fî 20 Za sene [1]237