İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 419 Hüküm no: 405 Orijinal metin no: [84a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Usta b. Hasan’ın malik olduğu berber dükkânını Mustafa Usta b. Sadullah’a sattığı İsmine tashîhan berber dükkânına sûret i‘tâsı Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kâin berber esnâfından es-Seyyid el-Hâc Ahmed Usta b. es-Seyyid Hasan nâm kimesne meclis-i şer‘-i enverde yine esnâf-ı mezkûreden es-Seyyid Mustafa Usta b. es-Seyyid Sadullah nâm kimesne mahzarında mahmiye-i mezbûrede Şehzâde Câmi‘-i şerîfi kurbünde Acemoğlu meydanında Nazif Efendi birâderi hânesi tahtında kâin bir bâb berber dükkânı derûnunda mevcûde başmuhâsebe kaleminde kendi ismime mukayyed beyne’l-esnâf gedik tâ‘bir olunur akd-i âti’z-zikrin sudûruna değin müstakillen yedimde mâlım ve mülküm olan ber-mûceb-i defter-i müfredât âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin şürût-ı müfsideden ârî iki yüz guruş semen-i makbûza mezbûr es-Seyyid Mustafa Usta’ya bey‘ ve temlîk ve teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ ba‘d âlât-ı lâzıme-i mezkûrede benim kat‘â alâka ve medhalim kalmayup mezbûr es-Seyyid Mustafa Usta’nın mâl-ı müşterâsı ve hakk-ı sırfı olmuşdur deyü ba‘de’l-ikrâr ve’t-tasdîk sâhib-i arzuhâl mezbûr es-Seyyid Mustafa Usta meclis-i şer‘-i münîrde zikri âtî bir bâb dükkâna bi’l-icâreteyn bâ-temessük-ı mütevellî mutasarrıf olan Attâr Mehmed Emin Ağa b. Mehmed mahzarında berber esnâfının kethüdâ vekîli İbrahim Ağa ve Şeyh Halil Efendi ve Duâcı el-Hâc Abdullah Efendi ve Yiğitbaşı es-Seyyid Mehmed Nuri ve Çavuş Mustafa Usta ve köşe ustası Ali Usta ve esnâfdan el-Hâc Ali Usta ve Ahmed Usta ve sâirleri hâzır oldukları hâlde ânifen şirâen mâlik olduğum âlât-ı lâzıme-i mezkûre mezbûr Attâr Mehmed Emin Ağa’nın merhûm Âbid Çelebi evkāfından olan şehriye otuz akçe icâre-i müecceleli âharın gediğinden ârî olup bâ-temessük-ı mütevellî mutasarrıf olduğu mahmiye-i mezbûrede Hâce Kadın Hamamı kurbünde Hızır Bey Mahallesi’nde vâki‘ bir tarafdan sebzevâtçı dükkânı ve bir tarafdan yine merkūm Mehmed Emin Ağa’nın mutasarrıf olduğu attâr dükkânı beynlerinde kâin şehriye altı guruş kirâlı bir bâb dükkâna mezbûr Mehmed Emin Ağa’nın rızâsıyla nakl ve mahâll-i mezbûrdan merkūm es-Seyyid el-Hâc Ahmed Usta ismine olan kayd-ı atîki ref‘ ve terkīn ve mahâll-i sâni-i mezkûrda kendi ismime tasrîhan kayd ve yedime müceddeden sûret i‘tâ olunmak bâbında istid‘â-yı inâyet eylediğim i‘lâm olunmak matlûbumdur dedikde mezbûr Attâr Mehmed Emin Ağa ber-vech-i muharrer gedik-i mezkûru mutasarrıf olduğu dükkâna nakline râzı olduğunu ba‘de’t-tasdîk bu makūle berber gedikleri hâmiş-i arzuhâlde mastûr derkenâr nâtık olduğu üzere mahâll-i âhara nakl ve tahvîl iktizâ ettikte gedik naklolunacak dükkânın mutasarrıfı râzı olurlar ise nakl-i berber esnâfının şürûtundan idüğünü hâzirûn-ı mezbûrûn dahi haber vermeleriyle şürûtu mûcebince zikr olunan berber gediğinin mahâll-i evvel-i merkūmda mezbûr es-Seyyid el-Hâc Ahmed Usta ismine olan kayd-ı atîki ref‘ ve terkīn ve mahâll-i sâni-i mezkûra nakl-birle müşteri-i mezbûr es-Seyyid Mustafa Usta ismine kayd ve yedine müceddeden sûret i‘tâsı iktizâ eylediği İstanbul Mahkemesi’nden [huzûr-ı âlîlerine i‘lâm olundu.] Fî 4 Z sene [12]37