İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 420 Hüküm no: 406 Orijinal metin no: [84a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simsar İsak v. Avram ile Yasef v. Salti’nin birbirlerinin zimmetlerini ibrâ ettikleri Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye arzuhâl takdîm eden İzmir tüccârından el-Hâc Mehmed Said b. Abdullah nâm kimesne bi’t-terâzî du‘âhânemizde ma‘kūd meclis-i şer‘-i enverde derûn-ı arzuhâlde ismi mastûr Simsar İsak v. Avram nâm Yahûdi muvâcehesinde derûn-ı arzuhâlde mastûrü’l-ism olup bundan akdem hâlik olan Simsar Yasef v. Salti nâm Yahûdi sağlığında tüccâr dellâlı olup hâlik-i mesfûrun yediyle mâlımdan bey‘ eylediğim şeker semeninden şekerci esnâfından ma‘lûmü’l-esâmî kimesneler zimmetlerinde alacak hakkım olan mebâliğ-i ma‘lûmeden bin yüz altmış guruş yirmi beş paramı kezâlik sağlığında benim emrimle tahsîl ve kabz ve umûruna sarfla istihlâk etmekle ol vechile damânen zimmetinde hakkım olan meblağ-ı mezbûru bana kable’l-edâ hâlik oldukda mesfûr Simsar İsak Yahûdi zimmetinde meblağ-ı mezbûrdan bir akçe hakkım olmayup lâkin mücerred hâlik-i mesfûrun şerîki olduğuna binâen meblağ-ı merkūmu kendi mâlından bana edâ eylesin deyü da‘vâ sadedinde olduğumda ol vechile mesfûrun zimmetinde alacak hakkım yoğiken hâlik-i mesfûrun deynini mâlından bana edâsı lâzım gelmeyüp hâlik-i mersûmun terekesinden mutâlebem iktizâ eylediği kıbel-i şer‘den bana tefhîm olundukta meblağ-ı mezbûr ber-vech-i muharrer hâlik-i mersûm Yasef Yahûdi [84b] zimmetinde alacak hakkım olup mesfûr İsak Yahûdi zimmetinde hakkım olmamağla husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt dahi eyledik deyü ikrâr ve tasdîkleri İstanbul Mahkemesi’nden [huzûr-ı âlîlerine i‘lâm olundu.] Fî 16 Z sene [1]237