İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 423 Hüküm no: 410 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırımlı İsmail Ağa’nın Tahtakale’deki tütün dükkânını Hasan Ağa b. Ali’ye sattığı Tahtakale kurbünde duhânî mağazası mübâya‘ası ve ismine tashîhan Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da Unkapanı kurbünde İbnimüderris Mahallesi’nde sâkin iken bundan akdem vefât eden Duhânî Abdullah Ağa b. Ahmed’in verâseti zevcesi Habibe Hatun bt. Ahmed ile sulbî kebîr oğlu Mehmed Sâdık Ağa’ya ba‘de’l-inhisâr zâtı mu‘arrefe zevce-i mezbûre ile oğlu mezbûr Mehmed Sâdık Ağa meclis-i şer‘-i enverde Âvineli? Kuşakçı el-Hâc Hasan Ağa b. el-Hâc Ali nâm kimesne mahzarında mahmiye-i mezbûrede Tahtakale kurbünde Papasoğlu Hanı tahtında han-ı merkūm kapısı cânibinden Asmaaltı nâm mahalle gidecek sokak köşesinde vâki‘ bir bâb duhânî mağazası derûnunda mevcûde beyne’l-esnâf gedik tâ‘bir olunur duhân âlât-ı lâzıme-i ma‘lûmesi maden kaleminde Kırımî İsmail Ağa ismine mukayyed olmağla kaydına ta‘arruz olunmayup bi’l-cümle esnâf ma‘rifetleriyle bey‘ u şirâ olunarak tedâvül-i eydî ile mûrisimiz müteveffâ-i mezbûrun ile’l-vefât yedinde mülk-i müşterâsı olup ba‘de vefâtihi bize mevrûs olmağın biz ber-vech-i muharrer akd-i âti’z-zikrin sudûruna değin irsen mâlikler olduğumuz âlât-ı lâzıme-i mezkûreyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin bin iki yüz guruş semen-i makbûza mezbûr el-Hâc Hasan Ağa’ya bi’l-verâse bey‘ ve temlîk ve teslîm eylediğimizde ol dahi ber-vech-i meşrûh yedimizden iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d zikr olunan duhânî mağazası gediği tâ‘bir olunur âlât-ı lâzıme-i ma‘lûmede bizim bi’l-verâse kat‘an alâka ve medhalimiz kalmayup mezbûr el-Hâc Hasan Ağa’nın mâl-ı müşterâsı ve hakk-ı sırfı olmuşdur deyü ba‘de’l-ikrâr ve’t-tasdîk tarafeynin takrîr ve tasdîklerini tütüncüler kethüdâsı Osman Ağa ve vekîli es-Seyyid Mustafa Ağa ve Yiğitbaşı es-Seyyid Abdullah Çelebi ve esnâfından es-Seyyid Mehmed Ağa nâm kimesneler dahi bi’l-muvâcehe haber vermeleriyle mûcebince âlât-ı mezkûrenin kaleminde Kırımî İsmail Ağa ismine olan kayd-ı atîki ref‘ ve terkīn ve müşteri-i mezbûr el-Hâc Hasan Ağa ismine tashîhan kayd ile yedine müceddeden sûret i‘tâ buyrulmak bâbında istid‘â-yı inâyet eyledikleri İstanbul Bâb mahkemesinden [huzûr-ı âlîlerine i‘lâm olundu.] Fî 16 Z sene [1]237