İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 422 Hüküm no: 409 Orijinal metin no: [84b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şişeci esnafı kethüdası Mehmed Salih Ağa’nın, Nevari v. Mosi aleyhine açtığı davada iddiasını ispat edemediğinden muarazadan men edildiği Şişeci esnâfın kethüdâlık avâidi takrîr-i meşrûhuyla men‘ Ma‘rûz[-ı dâ‘î-i devlet-i aliyyeleridir ki] Âsitâne-i aliyye ve tevâbi‘inde vâki‘ şişeci esnâfının bâ-berât-ı âlîşân kethüdâları sâhib-i arzuhâl el-Hâc Mehmed Salih Ağa nâm kimesne bi’l-ma‘iyye rü’yete memûr hâlâ Haremeyn-i şerîfeyn müfettişi mevâlî-i izâmdan fazîletlü Hatîbzâde es-Seyyid Mehmed Derviş Efendi dâ‘îleriyle Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde Dârü’s-sa‘âdeti’ş-şerîfe ağası hazretleri nezâretlerinde âsûde evkāfdan merhûme Mihrişah Vâlide Sultan -tâbe serâhâ- evkāf-ı celîleleri müstegallâtından Sapanca kazâsında Çini karyesinde Dutluk nâm mahalde kâin göztaşı i‘mâl olunur kârhânenin müsteciri derûn-ı arzuhâlde mastûrü’l-ism Nevari v. Mosi nâm Yahûdi muvâcehesinde vakf-ı merhûme-i müşârun-ileyhânın kāimmakām-ı mütevellîsi hâlâ Darbhâne-i âmire nâzırı Sa‘âdetlü Yusuf Efendi taraflarından mürsel vekîlleri Ali Bey b. Hasan Bey hâzır olduğu hâlde ben Âsitâne-i aliyye ve tevâbi‘inde işlenen göztaşı ve rastık taşı ve şişehâne fırınlarının bâ-mukābele-i nân berât-ı âlîşân ile kethüdâları olup bundan akdem bin iki yüz otuz beş senesi Cemâziyelâhiresinin üçüncü günü târihiyle müverrah yedimde olan bir kıt‘a fermân-ı âlide tahrîr olunduğu üzere kethüdâları olduğum esnâf ile beynimizde kethüdâ avâidi husûsunda münâza‘a eylediğimizde mahmiye-i mezbûrede Tekfursarayı’nda kârhânede pota i‘mâl eden potacı esnâfı i‘mâl ve bey‘ edecekleri emti‘alarından beher yüz guruşda üçer guruş ve kerpetçi kulesinde rastık taşı hark ve i‘mâl ve bey‘ eden hark ve i‘mâl ve bey‘ edeceği beher rastık taşı fırınından kırkar guruş ve Galatakulesi kapısınıda rastık taşı i‘mâl eden hark ve imal ve bey‘ edeceği beher rastık taşı fırınından on beşer guruş kethüdâlık avâidi olarak bana vermek üzere bi’t-terâzî ta‘ahhüd ben dahi kabûl ve hâlâ veregelüp lâkin mesfûr Nevari Yahûdi târih-i merkūmdan bir ay mukaddem mahâll-i merkūmda i‘mâl eylediği göztaşı içün şehriye bana on guruş vermeğe müte‘ahhid olmuş ise de emti‘asının ziyâdeye tahammülü olduğundan ben mikdâr-ı merkūma râzı olmayup Yahûdi-i mesfûr dahi ta‘annüd ve inâdında ısrâr ve müte‘ahhid olduğu şehriye on guruş dahi vermekden ibâ vü imtinâ‘ edüp ol vechile mersûmun mütemerrid ve anûd olduğu ve ben esnâf-ı merkūmun bâ-mukābele-i nân kethüdâsı ve şâyeste-i merhamet olduğum zâhir ve bâhir oldukda potacı ve rastık taşçı esnâfları ta‘ahhüdleri üzere kethüdâlıklarını rızâlarıyla vermek ve Yahûdi-i mesfûrun dahi rızâ ve adem-i rızâsından bahs olunmayarak şişeci esnâfının verdikleri misline nazaran i‘mâl ve bey‘ edeceği göztaşından beher yüz guruşda iki guruş kethüdâlık verüp rencîde etmemek üzere nizâm verilip târih-i merkūmdan işbu târihe gelince mesfûr Nevari Yâhudî kethüdâlık nâmıyla bir akçe vermemekle müctemi‘ olan avâidi mesfûr Nevari Yahûdi’den taleb ederim deyü da‘vâsı meşrû‘a olmayup kethüdâ-yı merkūm İstanbul ve tevâbi‘i esnâf-ı merkūme kethüdâsı olup zikr olunan Sapanca kazâsı İstanbul tevâbi‘i olan bilâd-ı selâsede olmamağla nizâmen dahi adem-i rızâsını takrîr eder iken mutâlebesi müvecceh olmadığı kendüye tefhîm ve da‘vâ-yı mezkûresiyle mesfûr Nevari Yahûdi’ye bî-vech-i şer‘î mu‘ârazadan men‘ olunduğu İstanbul Mahkemesi’nden [huzûr-ı âlîlerine i‘lâm olundu.] Fî 12 Za sene [1]237