İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 429 Hüküm no: 417 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çizmeci esnaflığından çıkarılması istenen Serkiz v. Kirkor, Serkiz v. İstefan ve Avanes v. Agob’un nizama uyacaklarını taahhüt ettikleri Ma‘rûz[-ı dâ‘î-i devlet-i aliyyeleridir ki] Hâlâ hâssa Çizmecibaşısı el-Hâc Hâfız İbrahim Efendi ve Âsitâne-i aliyye ve bilâd-ı selâsede vâki‘ bi’l-cümle dikici esnâfının dikicibaşıları Ali Ağa ve başyiğitbaşı Ömer Ağa ve çizmeci ustalarından es-Seyyid Mustafa Ağa ve es-Seyyid İbrahim İbiş Ağa ve mestçiler yiğitbaşısı Mehmed Ağa ile re‘âyâdan çizmeci esnâfı köşe ustaları Avanes ve Bâbek ve diğer Avanes ve Mıgırdıç ve diğer Mıgırdıç ve Artin ve diğer Artin nâm zimmîler ve sâirleri meclis-i şer‘-i enverde çizmeci esnâfı ustalarından Serkiz v. Kirkor ve diğer Serkiz v. İstefan ve âhar Avanes v. Agob zimmîler muvâcehelerinde mesfûrûn çizmeci ustalarından olup dâimâ nizâm-ı kadîmimize mugāyir hareket eylediklerinden mâ‘adâ dikicibaşı ve yiğitbaşı ve sâir ihtiyârlarına dahi itâ‘at ve inkıyâd etmeyerek dâimâ ihtilâl-i nizâmı mûceb-i ef‘âle tasaddî eylediklerinde biz dahi esnâf-ı mezkûreden ihrâc olunmalarını iltimâs etmişdik el-hâletü hâzihî mesfûrûndan her biri ef‘âl-i sâbıkālarından fâriğler olup fîmâ ba‘d dikicibaşı ve yiğitbaşı ve ihtiyâr ustalarından itâ‘at ve inkıyâd-birle nizâm-ı kadîme muhâlif hareket etmemeğe ta‘ahhüd edüp eğer hilâf-ı ta‘ahhüd hareket ederler ise tedîbe râzı olduklarında biz dahi ta‘ahhüdlerini kabûl etmemizle ber-vech-i muharrer esnâfdan hurûclarını iltimâs etmemek üzere ta‘ahhüd eyledik deyü takrîrlerini mesfûrûn Serkiz ve diğer Serkiz ve âhar Avanes zimmîlerden her biri tasdîk eyledikleri İstanbul Mahkemesi’nden [huzûr-ı âlîlerine i‘lâm olundu.] Fî 25 Z sene 1237