İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 430 Hüküm no: 418 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaz ahırı havâyi gedik davasında, Emine ve Fâtıma Hatunlar’ın Ahmed Ağa’ya karşı açtıkları davalarının reddedildiği Canbaz ahırının havâyi gedik men‘i Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye takdîm olunan işbu arzuhâlde mezkûrü’l-ism müteveffâ Canbaz es-Seyyid Mehmed b. es-Seyyid Hüseyin’in verâseti zevcesi Emine Hatun bt. Abdullah ile vâlidesi Hadice Hatun bt. İbrahim’e münhasıra ba‘dehû mezbûre Hadice Hatun dahi fevt olup verâseti ancak li-ebeveyn kız karındaşı Fâtıma Hatun’a ba‘de’l-inhisâr sâhibey-i arzuhâl zâtları mu‘arrefeler mezbûretân Emine ve Fâtıma Hatunlar Çarşamba günü arz odasında huzûr-ı hazret-i sadâret-penâhîde ma‘kūd meclis-i şer‘-i münîrde mahmiye-i İstanbul’da Atpazarı’nda Yukarıpazar nâm mahalde vâki‘ Ayasofya-i kebîr Câmi‘-i şerîfi vakfı müsakkafâtından şehriye on buçuk akçe icâre-i müecceleli ma‘lûmü’l-hudûd bir bâb canbaz ahırına bâ-temessük-ı mütevellî mutasarrıf olup zikr olunan ahırda canbazlık ticâretiyle sâkin olan derûn-ı arzuhâlde mezkûrü’l-ism Ahmed Ağa b. Ali nâm kimesne muvâcehesinde zikr olunan canbaz ahırına mukaddemâ bi’l-icâreteyn mutasarrıf olan es-Seyyid Ömer nâm kimesne bin iki yüz yirmi beş senesi Şevvâli’l-mükerreminin on beşinci gününden mûrisimiz müteveffâ-i evvel mezbûr Canbaz es-Seyyid Mehmed’e hayâtında şehriye on ikişer buçuk guruşa îcâr ve teslîm eylediğinde zikr olunan canbaz ahırında meccânen gedik i‘tibâr ve yedine kendi mührüyle memhûr îcâr ve gedik i‘tibârı tezkiresini i‘tâ edüp ol vechile mûrisimiz mezbûr sâlifü’z-zikr ahırın müsteciri ve derûnunda mevcûde havâî gedik yedinde mâlı iken fevt ve gedik-i mezkûr bize mevrûs oldukdan sonra ahır-ı merkūm muhterik olup arsa-yı sırfa iken mezbûr Ahmed Ağa teveffüz ve müceddeden binâ edüp bi-hakkın mutasarrıf olmağla kendi iskân etmişdi lâkin mücerred zikr olunan ahırı mukaddemâ mutasarrıfı olan mezbûr es-Seyyid Ömer ber-vech-i muharrer mûrisimiz müteveffâ-i evvel mezbûr Canbaz es-Seyyid Mehmed’e havâyi gedik i‘tibâriyle icârına binâen havâyi gedik bize mevrûs merkūm Ahmed Ağa zikr olunan ahırı tahliye ve bize îcâr eylesin deyü takrîr-i meşrûhları üzere eyledikleri havâyi gedik da‘vâları meşrû‘a olmayup gedik i‘tibârının nizâmen şürûtu dahi bir husûsun devâm ve istikrârı zımnında bâ-emr-i âlî aklâm-ı padişâhîden birinde mukayyed olursa [86b] i‘tibâr olunup mukayyed olmadığı takdîrce mülk ashâbı ve mütevellîleri ve esnâf kethüdâlarının havâyi gedik i‘tibâr etmeleri kānûnen dahi mu‘teber olmayup hâmiş-i arzuhâlde mastûr derkenârda zikr olunduğu üzere ahır-ı merkūmda gedik i‘tibârı kaydı bulunmadığını müdde‘iyetân-ı mezbûretân ikrâr dahi etmeleriyle mûcebince müdde‘iyetân-ı mezbûretân Emine ve Fâtıma Hatunlar ber-vech-i muharrer ahır-ı merkūmda havâyi gedik da‘vâlarıyla merkūm Ahmed Ağa’ya bî-vech-i şer‘î mu‘ârazadan men‘ olundukları İstanbul Mahkemesi’nden [huzûr-ı âlîlerine i‘lâm olundu.] Fî 27 Z sene [1]237