İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 439 Hüküm no: 427 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Efendi b. Musa’nın, Çekmececi Süleyman Ağa b. Hasan ile kira akdini feshettiği Çekmececi dükkânı fesh-i icârı der-mahalle-i Hacıküçük Ma‘rûz[-ı dâ‘î-i devlet-i aliyyeleridir ki] Sâhib-i arzuhâl Mısır kuzâtı eşrâfından es-Seyyid Yusuf Efendi b. es-Seyyid Musa nâm kimesne ile hâlâ zevcesi mu‘arrefetü’z-zât Hadice bt. Ali nâm hatun meclis-i şer‘-i münîrde derûn-ı arzuhâlde mezkûrü’l-ism Çekmececi es-Seyyid el-Hâc Süleyman Ağa b. Hasan nâm kimesne muvâcehesinde mezbûr es-Seyyid el-Hâc Süleyman Ağa İstanbul’da Mahmudpaşa kurbünde Hacıküçük Mahallesinde Sultanhamamı karşısında köşede vâki‘ bâ-temessük-ı mütevellî bi’l-icâreteyn bi’l-münâsafa taht-ı tasarrufumuzda olan ma‘lûmü’l-hudûd bir bâb vakıf menzilimiz tahtında kezâlik bâ-temessük-ı mütevellî bi’l-icâreteyn münâsafaten mutasarrıflar olduğumuz bir tarafdan enserci dükkânı ve iki tarafdan tarîk-i âm ile mahdûd bir bâb çekmececi dükkânımızda mu‘teber gedik olmayarak şehriye onar guruş kirâ ile müstecirimiz olup lâkin menzil-i mezkûrumuzun havlusu dayyık olduğundan dükkân-ı merkūmu sed ve menzilimize idhâl ile isti‘mâl etmek üzere bize şiddet-i lüzûmu olduğuna binâen târih-i i‘lâm şehri gāyetine izâfetle fesh-i akd-i icâre etmemizle dükkân-ı mezkûru tahliye ve bize teslîme mezbûr es-Seyyid el-Hâc Süleyman Ağa’ya tenbîh olunmak matlûbumuzdur deyü da‘vâ ettiklerinde ol dahi cevâbında kaziyye minvâl-i meşrûh üzere olup dükkân-ı mezkûr derûnunda hâmiş-i arzuhâlde mastûr derkenâr nâtık olduğu üzere kalemde mukayyed mu‘teber gedik olmadığını bi-tamâmihâ tâyi‘an ve kat‘iyyen ikrâr u i‘tirâf edüp lâkin kırk seneden berü dükkân-ı merkūm çekmececi dükkânı olarak babam müteveffâ Hasan ve ba‘dehû ben mukaddemâ mülk-i mutasarıflarının gedik i‘tibârlarıyla sâkinler olmamızla ol vechile gediğimdir demesi şer‘an ve kānûnen mu‘teber olmamağla ikrârı mûcebince dükkân-ı merkūmu gāyet-i şehr-i merkūmda tahliye ve zevcân-ı mezbûrân es-Seyyid Yusuf Efendi ve Hadice Hatunlara teslîme mezbûr es-Seyyid el-Hâc Süleyman Ağa’ya tenbîh olundukta ol dahi teslîme ta‘ahhüd edüp lâkin bu makūle mülk sâhibleri tama‘-ı hâmlarından nâşi müstecirlerini dükkânlarından ihrâc-birle müceddeden kahvehâne binâ ve ihdâs yâhud âhar esnâfa gedik i‘tibâr edüp ziyâde kirâ ile îcâr dâ‘iyesinde olmaları müstecirlerine gadri mûcib ve müceddeden kahvehâne ihdâsı bâ-emr-i âlî memnû‘ idüğü zevcân-ı mezbûrâna tefhîm olundukta zevcân-ı mezbûrân dahi her ne kadar sûret-i merkūme murâdları değil ise dahi fîmâ ba‘d dükkân-ı mezkûrun kepenklerini ref‘ ve yerine duvar binâ ve menzillerine idhâl edüp eğer âhara îcâr murâd ederler ise yine mezbûr çekmececiye îcâr etmek üzere her biri meclis-i şer‘de ta‘ahhüd eylediği İstanbul Mahkemesi’nden huzûr [-ı âlîlerine i‘lâm olundu.] Fî 27 Zilhicce sene 1237