İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 438 Hüküm no: 426 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid İbrahim Efendi’nin üç bab oda gediğini Mardiros v. Agob’a sattığı Ma‘rûz[-ı dâ‘î-i devlet-i aliyyeleridir ki] Zikri âtî odaların gediklerine bir kıt‘a sûret mûcebince mâlik olan es-Seyyid İbrahim Efendi b. Mehmed nâm kimesne meclis-i şer‘-i enverde Mardıros v. Agob nâm zimmî muvâcehesinde mahmiye-i mahkiyede Nuruosmanî câmi‘-i şerîfi kurbünde vâki‘ Yağcı Hanı demekle arîf bir bâb kârgîr hanın derûnunda vâki‘ odalardan tabaka-i süflâda tahtahan tarafında köşeye muttasıl bir ve yine tabaka-i süflâda tavuk pazarı tarafında köşeye muttasıl bir ve yine tabaka-i mezkûrede han kapısının sol tarafında ikinci köşeye muttasıl bir bâb ki cem‘an üç bâb odalar derûnlarında mevcûde beyne’l-hiref gedik tâ‘bir olunur âlât-ı lâzıme-i ma‘lûmeler akd-i âti’z-zikrin sudûruna değin bir kıt‘a sûret mûcebince yedimde mâlım ve mülküm olmağla ben zikr olunan tahtahan tarafında köşeye muttasıl bir ve Tavuk Pazarı tarafında köşeye muttasıl bir bâb ki cem‘an iki bâb odalar derûnlarında mevcûde gedikler âlâtını yedimde ibkā ve mâ‘adâ han kapısının sol tarafında ikinci köşeye muttasıl oda derûnunda mevcûde gedik âlâtını tarafeynden bi’l-îcâb ve’l-kabûl bâtten ve sahîhan bi-safkatin vâhidetin şürût-ı müfsideden ârî bin iki yüz guruş semen-i makbûza mersûm Mardıros zimmîye bey‘ ve temlîk ve teslîm eylediğimde ol dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d oda-i mezkûre derûnunda mevcûde gedik tâ‘bir olunur âlât-ı lâzıme-i merkūmede benin kat‘â alâka ve medhalim kalmayup mersûm Mardıros zimmînin mâl-ı müşterâsı ve hakk-ı sırfı olmuşdur deyü ba‘de’l-ikrâr ve’t-tasdîk gedik-i mezkûr kaleminde merkūm es-Seyyid İbrahim Efendi’nin ismine olan keydı ref‘ ve terkīn ve yedinde olan sûretden ifrâz ve mersûm Mardıros zimmî ismine tasrîhan kayd ve yedlerine başka sûret i‘tâsı bâbında istid‘â-yı inâyet eyledikleri İstanbul [mahkemesinden huzûr-ı âlîlerine i‘lâm olundu.] Fî 2 M sene [1]238