İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 441 Hüküm no: 429 Orijinal metin no: [88a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lağımcı Mustafa Ağa b. Ahmed ve eşi Hafîze bt. Abdullah’ın menzillerine sonradan açtıkları iki adet pencereyi kaldıracaklarını taahhüt ettikleri Menzil keşfi Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen zikri câ‘î husûsun mahallinde ketb ü tahrîri içün savb-ı şer‘-i enverden me’zûnen irsâl olunan Kâtib Mehmed Hidâyetullah Efendi dâ‘îleri ve bi’l-ma‘iyye rü’yete memûr Haremeyn-i şerîfeyn müfettişi mevâlî-i izâmdan Hatîbzâde Fazîletlü es-Seyyid Mehmed Derviş Efendi dâ‘îleri tarafından mürsel Kâtib Hüseyin Efendi hâssa mimarı hulefâsından Selim Sâbit ve Safi Mustafa Halîfeler ile İstanbul’da Avratpazarı kurbünde Canbâziye Mahallesi’nde tarîk-i hâsda vâki‘ münâza‘un-fîh olan bir bâb menzile varup cerîdede mazbûtü’l-esâmî Müslimîn huzûrlarında akd-i meclis-i şer‘-i Nebevî ettiklerinde menzil-i mezkûr karşısında kâin tarîk-i hass-ı merkūm erbâbından ashâb-ı arzuhâl zîr-i nezâret-i dâ‘îlerinde olan evkāfdan merhûm-ı mezbûr Canbâz Mustafa Ağa Vakfı müsakkafâtından ma‘lûmü’l-hudûd bir bâb menzile bâ-temessük-ı mütevellî bi’l-icâreteyn iştirâken mutasarrıflar olup kendi nefsinden asıl ve zevcesi Âişe bt. Abdullah nâm Hatun tarafından vekîl-i müseccel-i [88b] şer‘îsi es-Seyyid el-Hâc Mehmed Ağa b. es-Seyyid Ali ve Dârü’s-sa‘âdeti’ş-şerîfe ağası hazretleri nezâretlerinde âsûde evkāfdan Ayasofya-i Kebîr Vakfı müsakkafâtından ma‘lûmü’l-hudûd bir bâb menzile bâ-temessük-ı mütevellî bi’l-icâreteyn iştirâken mutasarrıflar olup kezâlik kendi nefsinden asıl ve zevcesi Şerîfe Fâtıma bt. Ahmed nâm Hatun tarafından vekîl-i müsecceli Haffâf es-Seyyid el-Hâc Halil Ağa b. es-Seyyid Ali ve yine zikr olunan Ayasofya-i Kebîr Vakfı müsakkafâtından ma‘lûmü’l-hudûd bir bâb menziline bâ-temessük-ı mütevellî bi’l-icâreteyn ber-vech-i iştirâk mutasarrıflar olup kezâlik kendi nefsinden asıl ve vâlidesi Fâtıma bt. Mustafa nâm hatun tarafından vekîl-i müseccel-i şer‘îsi es-Seyyid Derviş Ahmed b. es-Seyyid İbrahim nâm kimesnelerden her biri meclis-i ma‘kūd-ı mezkûrda zikr olunan Canbaz Mustafa Ağa Vakfı müsakkafâtından olup bir tarafdan tarîk-i hâs ve bir tarafdan el-Hâc Mehmed Ağa menzili ve tarafeyni tarîk-i âm ile mahdûd şehriye on beşer akçe icâre-i müeccele ile bir bâb menzile bâ-temessük-ı mütevellî bi’l-icâreteyn iştirâken mutasarrıflar olan tarîk-i hass-ı merkūm erbâbından derûn-ı arzuhâlde mezkûrü’l-ism Lağımcı es-Seyyid el-Hâc Mustafa Ağa b. es-Seyyid Ahmed ile zevcesi mu‘arrefetü’z-zât Hafîze bt. Abdullah nâm hatun muvâcehelerinde mârrü’l-beyân Canbaz Mustafa Ağa Vakfı’nın mütevellîsi mevâlî-i izâmdan hâlâ Galata Kādısı Keçecizâde fazîletlü Mehmed İzzet Efendi tarafından mürsel vekîli es-Seyyid Mehmed Ağa b. Ali hâzır olduğu hâlde zevcân-ı mezbûrân es-Seyyid el-Hâc Mustafa Ağa ve Hafîze Hatun iştirâken mutasarrıflar oldukları menzilleri yüz tarafında mimârân-ı mezbûrân mesâhalarıyla tûlen on bir buçuk zirâ‘ ve tarîk-i hâs ağzı tarafından arzen on dört buçuk parmak ve tarîk-i âm ağzı tarafından yedi parmak bi-hesâb-ı terbî‘i yedi zirâ‘ dokuz parmak mahalli bi-gayr-ı hakkın zabt ve menzillerine ilâve eylediklerinden mâ‘adâ bu esnâda müceddeden binâ ve inşâ eyledikleri menzil-i mezkûrun fevkānîsinde bir bâb odalarının iki aded pencerelerinden bizim ber-vech-i iştirâk mutasarrıflar olduğumuz menzillerimizin makarr-ı nisvân olan oda ve sofalarımıza nezâret ve havâlîsi olmağla zikr olunan yedi zirâ‘ dokuz parmak mahalde n keff-i yed ve mârru’z--zikr ihdâs eyledikleri iki aded pencerelerinin nezâret ve havâlîsini def‘a zevcân-ı mezbûrâna tenbîh olunmak bi’l-asâle ve bi’l-vekâle murâdımızdır deyü da‘vâya tasaddî etmişdik el-hâletü hâzihî muslihûn tavassutuyla beynimiz tevfîk ve ıslâh olunup ber-vech-i muharrer bi’l-asâle ve bi’l-vekâle tasaddî eylediğimiz yedi zirâ‘ dokuz parmak mahalli nizâ‘ından meccânen fâriğler olmamızla zevcân-ı mezbûrân dahi ihdâs eyledikleri iki aded pencerelerinin kezâlik mimârân-ı mezbûrân mesâhalarıyla kadden bir zirâ‘ mahallini sedd ve bend ile nezâret ve havâlesini def‘ etmek üzere ta‘ahhüd ve bu vechile külliyen kat‘-ı münâza‘a eyledik deyü ikrâr ve tasdîklerini kâtibân-ı mezbûrân mahallinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelüp her biri alâ-vukū‘ihi inhâ ve takrîr eylediği ba‘de’t-tenfîz İstanbul Mahkemesi’nden [huzûr-ı âlîlerine i‘lâm olundu.] Fî 29 Z sene [1]237