İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 442 Hüküm no: 430 Orijinal metin no: [88b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asmaaltında Musa Ağa ismine kayıtlı olan tütün dükkânının kaydı terkin edilerek, Seyyid Süleyman Ağa ismine kaydedildiği Asmaaltı nâm mahalde Yenikapılı Musa Ağa ismine olan kaydı terkīn ve es-Seyyid Süleyman Ağa ismine tashîhan sûret i‘tâsı Ma‘rûz[-ı dâ‘î-i devlet-i aliyyeleridir ki] Mahrûse-i Galata’ya muzâfe kasaba-i Kasımpaşa’da Kulaksız Mahallesinde sâkin iken bundan akdem fevt olan Duhânî Mehmed Ağa b. İsmail nâm kimesnenin verâseti zevce-i menkûha-i metrûkesi Hâmide bt. Süleyman nâm hatun ile sulbî oğlu Duhânî es-Seyyid Osman Ağa’ya münhasıra ba‘dehû merkūm es-Seyyid Osman Ağa dahi fevt olup verâseti vâlidesi mezbûre Hâmide Hatun ile li-ebeveyn ammi oğulları ipçi esnâfından Mustafa Ağa ve Abdullah Ağa ibney Ebûbekir b. el-mezbûr İsmail’e münhasıra ve tashîh-i meselesi bi-hükmi’l-münâsahati’ş-şer‘iyye yirmi dört sehmden olup sihâm-ı mezbûreden on sehmi merkūme Hâmide Hatun’a ve yedişer sehmden cem‘an on dört sehmi merkūmân Mustafa Ağa ve Abdullah Ağa’dan her birine isâbeti tahakkukundan sonra merkūmân Mustafa Ağa ve Abdullah Ağa asâleten ve zevce-i mezbûre Hâmide Hatun tarafından husûs-ı âtîde vekîl olduğu zâtını ârifân Kaşıkçı İbrahim Edhem Ağa b. Mehmed Ali ve Kalyoncu Ahmed Ağa b. Halil nâm kimesneler şehâdetleriyle sâbit olan sâbıkā Ağakapısı Baştüfekçisi İsmail Ağa b. Ahmed nâm kimesne vekâleten meclis-i şer‘-i münîrde bâ‘isü’l-i‘lâm Mısır tüccârından Ispartalı es-Seyyid Süleyman Ağa b. es-Seyyid el-Hâc Mustafa nâm kimesne tarafından husûs-ı âtîde tasdîka vekîli Mısır tüccârından İzmirîzâde es-Seyyid el-Hâc Ahmed Ağa b. el-Hâc Mustafa nâm kimesne mahzarında İstanbul’da tahmîs civârında Asmaaltı nâm mahalde dört yol ağzında vâki‘ bir tarafdan Mesudzâde el-Hâc Hasan Ağa mahzeni ve bir tarafdan Kumâriyeli el-Hâc Ali Ağa mahzeni ve verâsı Bostancı Hanı ve taraf-ı râbi‘i tarîk-i âm ile mahdûd maden kaleminde Yenikapılı Musa Ağa ismine mukayyed şehriye on guruş kadîm kirâlı Demirkapılı bir bâb kârgîr duhânî mağazası derûnunda mevcûde beyne’l-hiref gedik tâ‘bir olunur bir kantar ve bir manola ve bir akçe tahtası ve bir peştahte ve sâir âlât-ı lâzıme-i ma‘lûme müteveffâ-i evvel-i merkūm Mehmed Ağa’nın ile’l-vefât müstakillen yedinde mülkü ve ba‘de vefâtihi bi-tarîkı’l-münâsaha müvekkile-i merkūme ile bize mevrûs olmağla hâlâ biz ve müvekkile-i mezbûre Hâmide Hatun mağaza-i mezkûre derûnunda mevcûde ber-vech-i muharrer irsen mâlik olduğumuz gedik tâ‘bir olunan âlât-ı lâzıme-i mezkûreyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin müvekkil-i merkūm es-Seyyid Süleyman Ağa’ya dokuz bin guruşa her birimiz bi’l-verâse bey‘ ve temlîk ve vech-i lâyıkı üzere teslîm eylediğimizde ol dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl semeni olan meblağ-ı mezkûr dokuz bin guruşu müşteri-i müvekkil-i merkūm es-Seyyid Süleyman Ağa bize def‘ ve teslîm biz dahi yedinden tamamen ve kâmilen ahz ü kabz ve bi-kadri’l-hısas beynimizde iktisâm edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik fîmâ ba‘d âlât-ı gedik-i merkūmda bizim ve müvekkile-i mezbûrenin kat‘â alâka ve medhalimiz kalmayup müvekkil-i merkūm es-Seyyid Süleyman Ağa’nın emvâl-i müşterâtı ve hakk-ı sırfı olmuşdur deyü ba‘de’l-ikrâr ve’t-tasdîk gedik-i merkūmun kaleminde Yenikapılı Musa Ağa ismine olan kayd-ı atîkine ta‘arruz olunmayup bâ-hücec-i şer‘iyye bey‘ u şirâ olunarak tedâvül-i eydî ile müteveffâ-i evvel-i mezbûrun ile’l-vefât mülk-i müşterâsı idüğü tütüncüler kethüdâsı es-Seyyid Osman Ağa ve vekîli Mustafa Ağa ve Yiğitbaşı es-Seyyid Abdullah Çelebi ve sâir mazbûtü’l-esâmî kimesneler haberleriyle dahi zâhir oldukdan sonra gedik-i merkūmun kaleminde Yenikapılı Musa Ağa ismine olan kayd-ı evveli ref‘ ve terkīn ve müvekkil-i merkūm Ispartalı es-Seyyid Süleyman Ağa’nın ismine tashîhan kayd-birle yedine bir kıt‘a sûret i‘tâ buyrulmasını vekîl-i mezbûr es-Seyyid el-Hâc Ahmed Ağa istid‘â eylediği İstanbul [mahkemesinden huzûr-ı âlîlerine i‘lâm olundu.] Fî-selh-i Z sene [1]237