İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 447 Hüküm no: 434 Orijinal metin no: [89b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahfazacı Kigork v. Lacin’in, kuyumcu mahfazalarının imalinin kendine mahsus olduğu iddiasıyla Mahfazacı Karabet v. Asvador ve Begos v. Artin aleyhine açtığı davasının reddedildiği Mahfaza i‘mâlinin hasr davâsı memnû‘ olduğu Ma‘rûz[-ı dâ‘î-i devlet-i aliyyeleridir ki] Sâhib-i arzuhâl Mahfazacı Kigork v. Lacin nâm zimmî Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde derûn-ı arzuhâlde isimleri mastûr Mahfazacı Karabet v. Asvador ve Begos v. Artin nâm zimmîler muvâcehelerinde kuyumcular kethüdâsı Ali Ağa nâm kimesne ile mütevellîler Takfor zimmî hâzır oldukları hâlde Âsitâne-i aliyyede kâin kuyumcu esnâfının i‘mâl eyledikleri mücevherâtı vaz‘ içün iktizâ eden bi’l-cümle mahfazalarını i‘mâl etmek bundan akdem işbu yedime i‘tâ buyrulan bin iki yüz otuz altı senesi Saferi’l-hayrının on sekizinci günü târihiyle müverrah bir kıt‘a sûret derûnunda tahrîr olunduğu üzere bana hasr ve tahsîs olunup sâir mahfazacı esnâfı ber-vech-i muharrer kuyumcu esnâfına mücevherât mahfazası i‘mâlinden memnû‘lar iken mesfûrân Karabet ve Begos zimmîler sâir mahfaza i‘mâline kanâ‘at etmeyüp bana mahsûs olan kuyumcu esnâfının mücevherât mahfazalarını i‘mâl etmeleriyle suâl olunup mesfûrân kuyumcu esnâfına mücevherât mahfazası i‘mâllerinden men‘-birle esnâf-ı mezkûreye mücevherât i‘mâli yine bana hasr ve tahsîs olunmak matlûbumdur deyü eylediği inhisâr da‘vâsı şer‘an ve kānûnen mesmû‘a olmayup iltifâta şâyân olmadığı müdde‘î-i mesfûra tefhîm ve mûcebiyle mesfûrâna bî-vech mu‘ârazadan ba‘de’l-men‘ zikr olunan mahfaza i‘mâli san‘at-ı vâhide olmağla gerek müdde‘î-i mesfûr ve gerek mesfûrân Karabet ve Begos zimmîlerden her biri san‘atları olan kuyumcu esnâfının mücevherât mahfazalarını ve ibâdullâha sa‘at ve sâir eşya mahfazalarını ke’l-evvel i‘mâl edüp her biri şer‘an ve kānûnen memnû‘ olan inhisâr da‘vâsıyla âharın i‘mâline mümâna‘at etmemek üzere şifâhen sâdır olan fermân-ı âlîleri mûcebince dahi tarafeyne tenbîh olunduğu İstanbul Mahkemesi’nden [huzûr-ı âlîlerine i‘lâm olundu.] Fî 24 Z sene [1]237