İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 448 Hüküm no: 435 Orijinal metin no: [89b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihaliç voyvodası Ali Ağa b. Mustafa’nın, Salih Efendi b. Veliyüddin ve Tuzcu Hüseyin Ağa aleyhine açtığı buğday davasının Bursa’da görülmesi talebi Ma‘rûz[-ı dâ‘î-i devlet-i aliyyeleridir ki] Sâbıkā Mihaliç voyvodası sâhib-i arzuhâl el-Hâc Ali Ağa b. el-Hâc Mustafa nâm kimesne bi’l-ma‘iyye rü’yete memûr Haremeyn-i şerîfeyn müfettişi mevâlî-i izâmından Fazîletlü Hatîbzâde es-Seyyid Mehmed Derviş Efendi dâ‘îleriyle Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde hâmişi arzuhâlde mastûr derkenâr nâtık olduğu üzere mahrûse-i Bursa’dan bâ-fermân-ı âlî ihzâr ettirdiği derûn-ı arzuhâlde isimleri mezkûr Debbâğ el-Hâc Salih Efendi b. Veliyüddin ve Tuzcu el-Hâc Hüseyin Ağa b. Osman nâm kimesneler muvâcehelerinde Dârü’s-sa‘âdeti’ş-şerife ağası hazretleri nezâretlerinde âsûde evkāfdan mahrûse-i Bursa’da vâki‘ Murâdiye İmâreti Vakfı’nın kāimmakām-ı mütevellîsi olup diğer arzuhâl hâmişinde muharrer derkenârda zikr olunduğu üzere kezâlik bâ-fermân-ı âlî ihzâr olunan es-Seyyid el-Hâc İbrahim Ağa b. Hüseyin nâm kimesne hâzır olduğu hâlde bin iki yüz otuz altı senesi hılâlinde ben zikr olunan Mihaliç voyvodası iken imâret-i mezkûre levâzımı içün müretteb olan mahrûse-i Bursa [90a] keyli ile beş bin dokuz yüz on beş keyl hıntayı zikr olunan Mihaliç kazâsından mahrûse-i mezbûreye merkūmân el-Hâc Salih Efendi ve el-Hâc Hüseyin Ağa’ya irsâl ve kāimmakām-ı hâzır-ı mezbûr es-Seyyid el-Hâc İbrahim Ağa’ya teslîm etmek üzere mezbûrâna emr eylediğimde onlar dahi ba‘de’l-kabz ancak iki bin iki yüz kırk beş keylini hâzır-ı mezbûr es-Seyyid el-Hâc İbrahim Ağa’ya def‘ ve teslîm edüp mâ‘adâsı olan üç bin altı yüz yetmiş keyli yedlerinde kalmağla hınta-ı bâkiye-i mezkûre mevcûd ise mahallinde aynen müstehlike ise kezâlik mahallinde mislini mezbûrândan tazmîn taleb ederim deyü ba‘de’d-da‘vâ ve’l-istintak mezbûrân el-Hâc Salih Efendi ve el-Hâc Hüseyin Ağa cevâblarında müdde‘î-i mezbûr el-Hâc Ali Ağa’nın zikr olunan Mihaliç kazâsından Murâdiye İmâreti levâzımı içün beş bin dokuz yüz on beş keyl hınta olmak üzere bize irsâl eylediği hıntayı ber-vech-i muharrer emriyle kāimmakām-ı hâzır-ı mezbûr es-Seyyid el-Hâc İbrahim Ağa’ya teslîm edecek olduğumuzda kāimmakām-ı hâzır-ı mezbûr dahi gāib ani’l-meclis karındaşı es-Seyyid Mustafa Ağa nâm kimesneye def‘ ve teslîm etmek üzere bize emr edüp siz dahi kāimmakām-ı hâzır-ı mezbûrun emriyle karındaşı mezbûre tekyîl ve teslîm eylediğimizde hınta-i mezkûre ancak beş bin üç yüz doksan keyl hınta olup ol mikdârını biz kabz ve ber-vech-i muharrer emriyle teslîm edüp hatta hâzır-ı mezbûr es-Seyyid el-Hâc İbrahim Ağa zikr olunan beş bin üç yüz doksan keyl hıntayı emriyle karındaşı gāib-i mezbûr es-Seyyid Mustafa Ağa’ya teslîm ol dahi yedimizden kabz eylediğini ikrâr dahi etmekle ol mikdârda üzerimize red ve damândan nesne lâzım olmayup mâ‘adâsı olan beş yüz yirmi beş keyl hınta noksan olmağla biz kabz etmedik deyü ancak beş bin üç yüz doksan keyl hıntayı kabzlarını ikrâr ve mikdâr-ı makbûzlarını sâniyen kāimmakām-ı hâzır-ı mezbûrun emriyle karındaşı gāib-i mezbûra teslîmlerini ikrârı da‘vâsıyla eyledikleri def‘lerini müdde‘î-i merkūm el-Hâc Ali Ağa ve kāimmakām-ı hâzır-ı mezbûr es-Seyyid el-Hâc İbrahim Ağa’dan her biri ba‘de’l-inkâr mezbûrân el-Hâc Salih Efendi ve el-Hâc Hüseyin Ağa def‘-i meşrûhlarına bi’d-defa‘ât şâhid olmak üzere ikāme eyledikleri kimesneler edâ-yı şehâdet-i şer‘iyye edemeyip şâhid-i âhar ikāmesine havâle olunduklarında âhar şâhidlerimiz mahrûse-i Bursa’da sâkinlerdir deyü tâlib-i tahlîf dahi olmamalarıyla bu sûretde husûs-ı mezkûr mahrûse-i mezbûrede Haremeyn müfettişi vekîli efendi dâ‘îleri huzûrunda rü’yet olunmak üzere şifâhen sâdır olan fermân-ı âlîlerine imtisâlen tarafeyn râzılar olmalarıyla ol bâbda bir kıt‘a fermân-ı âlîşân sudûru re’y-i sâmîlerine menût idüğü İstanbul Mahkemesi’nden [huzûr-ı âlîlerine i‘lâm olundu.] Fî 8 M sene [1]237