İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 458 Hüküm no: 443 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüsrev Paşa’daki İbrahim Usta ismine kayıtlı berber dükkânı gediğinin Mehmed Usta b. Hüseyin ismine kaydedilmesi Ma‘rûz[-ı dâ‘î-i devlet-i aliyyeleridir ki] Sâhib-i arzuhâl Berber Mehmed Usta b. Hüseyin nâm kimesne meclis-i şer‘-i enverde Âsitâne-i aliyyede kâin berberler kethüdâsı vekîli İbrahim Ağa ve şeyhleri Halil Efendi ve Du‘âcı el-Hâc Abdullah ve Yiğitbaşı es-Seyyid Mehmed Nuri ve Çavuş Mustafa Ağa ve köşe ustası es-Seyyid Mehmed Şâkir Usta hâzır oldukları hâlde hâmiş-i arzuhâlde mastûr derkenâr nâtık olduğu üzere mahmiye-i İstanbul’da Hüsrev Paşa’da Türbe karışında İbrahim Usta ismine mukayyed ma‘lûmü’l-hudûd bir bâb berber dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme merkūm İbrahim Ustadan telakkī eden ashâbından tedâvül-i eyâdî ile bey‘ u şirâ olunup kayd-ı evveline ta‘arruz olunmayarak hâlâ yedimde mâl-ı müşterâm ve dükkân-ı merkūmda ben müstecir iken dükkân-ı mezkûr muhterik olup mutasarrıfı dahi binâ etmemekle bu makūle berber gedikleri mahâll-i âhara nakl murâd olundukta gedik naklolunacak dükkân ashâbının re’y ve rızâsıyla naklolunmak derkenârda zikr olunduğu üzere esnâfımızın şürût-ı nizâmlarından olmağın zikr olunan Hüsrev Paşa’da Türbe karşısında İbrahim Usta ismine mukayyed mukaddemâ müsteciri olduğum muhterik dükkânda mevcûde [92b] yedimde mâlım olan berber gediği tâ‘bir olunur âlât-ı lâzıme-i ma‘lûmem şürût-ı nizâmımıza tatbîkan esnâf-ı hâzirûn-ı mezbûrûndan ba‘de’l-istihbâr mahmiye-i mezbûrede Sarıgez nâm mahalde Çıkrıkçı Kemal Mahallesinde vâki‘ bir tarafdan kolluk ve bir tarafdan menzil ve tarafeyni tarîk-i âm ile mahdûd sâlifü’z-zikr Çıkrıkçı Kemal Vakfı müsakkafâtından kimesnenin alâkası olmayup bi’l-icâreteyn taht-ı tasarrufumda olan âharın gediğinden ârî bir bâb dükkânıma nakl ile âlât-ı mezkûrenin İbrahim Usta ismine olan mahâll-i evveli kaydı ref‘ ve terkīn ve mahâll-i sâni-i merkūma nakl ile kendi ismime tashîhan kayd ve yedime sûret i‘tâ buyrulmak bâbında istid‘â-yı inâyet ederim deyü takrîr ve istirhâm ettikte mezbûr Berber Mehmed Usta’nın ber-vech-i muharrer istid‘âsı vâkı‘a mutâbık ve esnâf-ı mezkûrenin şürût-ı nizâmlarına muvâfık idüğüni esnâf-ı hâzirûn-ı mezbûrûn dahi haber vermeleriyle bu sûretde zikr olunan gedik âlâtının mahâll-i evvelde İbrahim Usta ismine olan kayd-ı atîki ref‘ ve terkīn ve kendi tasarrufunda olan mahâll-i sâni-i merkūma nakl ile mezbûr Berber Mehmed Usta ismine tashîhan kayd ve yedine sûret i‘tâ buyrulmak iktizâ eylediği İstanbul Mahkemesi’nden [huzûr-ı âlîlerine i‘lâm olundu.] Fî 9 M sene [1]238