İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 457 Hüküm no: 442 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Murad’ın Seyyid Hasan Ağa aleyhine açtığı gedik davasının reddedildiği Ma‘rûz[-ı dâ‘î-i devlet-i aliyyeleridir ki] İstanbul’da Ebulfeth Sultan Mehmed Hân hazretleri Câmi‘-i şerîfi kurbünde Pirinççi Sinan Mahallesinde sâkin iken bundan akdem fevt olan derûn-ı arzuhâlde mezkûrü’l-ism süpürgeci esnâfından es-Seyyid Mustafa Alemdâr b. es-Seyyid Mehmed’in verâseti zevce-i menkûha-i metrûkesi Âişe bt. Murad nâm Hatun ile sulbiye sagīre kızı Şerîfe Hafîze’ye inhisârı tahakkukundan sonra kendi nefsinden asıl ve sagīre-i mezbûre Şerîfe Hafîze’nin vâlidesi ve vasiyy-i mansûbesi sâhibe-i arzuhâl mu‘arrefetü’z-zât zevce-i mezbûre Âişe Hatun meclis-i şer‘-i münîrde derûn-ı arzuhâlde mezkûrü’l-ism Kılabdancı es-Seyyid Hasan Ağa b. el-müteveffâ el-Hâc Hüseyin nâm kimesne muvâcehesinde İstanbul hısnı ebvâbından Topkapı kurbünde Bâyezid Ağa Câmi‘-i şerîfi Vakfı müsakkafâtından İstanbul’da Laleli civârında Koska nâm mahalde Mimar Kemaleddin Mahallesinde vâki‘ mezbûr es-Seyyid Hasan Ağa’nın pederi müteveffâ-i mezbûr el-Hâc Hüseyin Ağa’nın ma‘lûmü’l-hudûd ve’l-müştemilât bir bâb menzili ittisâlinde kâin hâmiş-i arzuhâlde mastûr derkenâr nâtık olduğu üzere fi’l-asl kurabiyeci gediği olarak Mehmed ismine mukayyed bir bâb kurabiyeci dükkânı bâ-temessük-ı mütevellî bi’l-icâreteyn mezbûr es-Seyyid Hasan Ağa’nın pederi müteveffâ-i mezbûr el-Hâc Hüseyin’in taht-ı tasarrufunda ve derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme dahi ba‘dehû süpürgeci gediği olmak üzere mukayyed olmayarak mûrisim zevcim müteveffâ-i mezbûr es-Seyyid Mustafa Alemdâr’ın hayâtında dört sene mukaddem yedinde emvâli iken mezbûr es-Seyyid Hasan Ağa’nın pederi müteveffâ-i mezbûr el-Hâc Hüseyin Ağa ber-vech-i muharrer mutasarrıf olduğu menzil-i mezkûru dayyık olduğuna binâen dükkân-ı mezkûru zevcim mûrisim müteveffâ-i mezbûr es-Seyyid Mustafa Alemdâr’ın izniyle menziline ilhâk edüp zevcim mûrisim müteveffâ-i mezbûr dahi rızâsıyla dükkân-ı mezkûr derûnunda mevcûde gedik tâ‘bir olunur süpürgeci âlât-ı lâzıme-i mezkûresini dükkân-ı mezkûr civârında kâin âhar bir bâb dükkâna nakl ettikden sonra mezbûr el-Hâc Hüseyin Ağa fevt olup menzil-i mezkûr ile mârru’z--zikr menziline ilâve eylediği kurabiyeci dükkânının mahalli ancak sulbî oğlu es-Seyyid Hasan Ağa’ya âdiyen intikāl edüp lâkin ber-minvâl-i muharrer zevcim mûrisim müteveffâ-i mezbûr es-Seyyid Mustafa Alemdâr’ın nakl-i gedik eylediği süpürgeci dükkânı mahalli ma‘lûmum olmamağla mezbûr es-Seyyid Hasan Ağa’nın pederi müteveffâ-i mezbûr el-Hâc Hüseyin Ağa’nın hayâtında menziline ilâve eylediği kurabiyeci dükkânının mahalline yine dükkân binâ edüp yâhud zevcim müteveffâ-i mezbûrun süpürgeci gediği naklolunan dükkânı hangi dükkân ise bana teslîme mezbûr es-Seyyid Hasan Ağa’ya tenbîh olunmak bi’l-asâle ve bi’l-vesâye matlûbumdur deyü tasaddî eylediği da‘vâsı meşrû‘a ve iltifâta şâyân olmadığı kendüye tefhîm ve da‘vâ-yı mezkûresiyle mezbûr es-Seyyid Hasan Ağa’ya bî-vech-i şer‘î mu‘ârazadan men‘ olunduğu İstanbul Mahkemesi’nden [huzûr-ı âlîlerine i‘lâm olundu.] Fî 11 M sene [1]238