İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 461 Hüküm no: 447 Orijinal metin no: [93a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cihânbeyli ve Zîveli aşiretinin Anadolu’dan İstanbul’a getirdiği koyunların kasap esnafına dağıtımı Ma‘rûz[-ı dâ‘î-i devlet-i aliyyeleridir ki] Bu def‘a vilâyet-i Anadoluda vâki‘ Karapınar cânibinden Âsitâne-i aliyyeye ber-vech-i âtî keçi ve karaman ağnâmı getiren Cihânbeyli aşîreti celebânından Avaş oğlu Abdurrahman nâm kimesne zabıtları Mustafa Bey tarafından vekîl-i mürseli Ali Kethüdâ ile celebân-ı merkūmûndan Karamanlı Hasan ve Kasab Ahmed nâm kimesneler hâzır oldukları hâlde meclis-i şer‘-i enverde hâlâ Yedikule kasablar kethüdâsı el-Hâc Hasan Ağa b. el-Hâc Osman muvâcehesinde Yedikule ve Eğrikapu kasab ustalarından ma‘lûmü’l-esâmî kimesneler kezâlik hâzır oldukları hâlde ben ve hâzırân-ı mezbûrân ve gāibûn ani’l-meclis Karamanlı es-Seyyid Mustafa ve es-Seyyid Ahmed ve Zîveli Deli Hüseyin oğlu Hüseyin nâm kimesnelerin Âsitâne-i aliyyeye sevk ve tesyîr eylediğimiz bin dokuz yüz elli re’s karaman ağnâmı ve dört bin iki yüz elli re’s keçi luhumunun beher vakıyyesini biz kassabâna otuz ikişer paraya ağnâm kuyruğunun beher vakıyyesini otuz yedişer paraya ve keçi sakatlarını yirmi beşer paraya ve ağnâm sakatlarını onar paraya vermek üzere ta‘ahhüd eylediğimizde kethüdâ-yı merkūm dahi dört gün bizim ağnâmımızı ve dört gün Rumeli celebânı ağnâmını tevzî‘ ve yevm-i tevzî‘den kırk bir gün tamamında yaftalarımızı ve kassabân dahi yetmiş bir gün tamamında iktizâ eden semenlerini bize edâya ve lühûmun beher vakıyyesini otuz beşer paraya ve kuyruğun beher vakıyyesini kırkar paraya ibâdullâha beye ta‘ahhüd eylediler deyü ikrâr ve tasdîkleri İstanbul [mahkemesinden huzûr-ı âlîlerine i‘lâm olundu.] Fî 8 M sene [1]238