İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 462 Hüküm no: 448 Orijinal metin no: [93a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer b. Ali’nin, Yedikule’deki Sultan Abdülhamid Han vakfından icareli yarım hisse kasap dükkânı gediğini Mehmed Emin Ağa’ya devrettiği Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm-ı mağfiret-nişan Sultan Abdülhamid Hân -tâbe serâhu- hazretlerinin evkāf-ı celîlelerinden mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden birinci selhhâneye merbût mahrûse-i Galata’ya muzâfe kasaba-i Kasımpaşa’da köprü karşısında vâki‘ aşçı dükkânına muttasıl ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısf hisse-i şâyi‘asına bâ-temessük-ı mütevellî mutasarrıf olan es-Seyyid Ömer b. es-Seyyid Ali nâm kimesne meclis-i şer‘-i enverde hâlâ hâssa kasabbaşısı [93b] dergâh-ı âlî kapıcı başılarından es-Seyyid el-Hâc Mustafa Ağa tarafından vekîl-i mürseli kasablar Kethüdâsı el-Hâc Hasan Ağa b. el-Hâc Osman hâzır olduğu hâlde kasab ustalarından el-Hâc Mehmed Emin Ağa b. Ahmed muvâcehesinde mârrü’l-beyân kasaba-i Kasımpaşa’da köprü karşısında vâki‘ aşçı dükkânına muttasıl bir bâb kasab dükkânı derûnunda mevcûde gedik tâ‘bir olunur âlât-ı lâzıme-i ma‘lûmeden ber-mûceb-i temessük mutasarrıf olduğum nısf hisse-i şâyi‘amı hüsn-i rızâ ve tayyib-i hâtırım ve ferağ-ı mu‘teber-ı kat‘î ile merkūm el-Hâc Mehmed Emin Ağa’ya bâ-re’y-i mütevellî ferağ ve tefvîz eylediğimde ol dahi tefevvüz ve kabûl edüp fîmâ ba‘d dükkân-ı mezkûr derûnunda mevcûde gedik tâ‘bir olunur âlât-ı lâzıme-i ma‘lûmede benim kat‘â alâka ve medhalim kalmayup nısf hisse-i şâyi‘a-i mezkûre merkūm el-Hâc Mehmed Emin Ağa’nın dâhil-i havza-i tasarrufu olmuşdur deyü eylediği ikrâr u i‘tirâfını merkūm el-Hâc Mehmed Emin Ağa tasdîk ve hisse tevzî‘ini kethüdâ ve bi’l-cümle ustalar ma‘rifetleriyle tamamen ahz etmek üzere ta‘ahhüd etmekle nısf hisse-i mezkûre fâriğ-i mezbûrun kasr-ı yedinden mezbûr el-Hâc Mehmed Emin Ağa üzerine tahrîr ve temhîr ve zabt ve tasarrufu içün taraf-ı vakıfdan yedine temessük i‘tâsı iktizâ eylediği İstanbul Mahkemesi’nden [huzûr-ı âlîlerine i‘lâm olundu.] Fî 2 S sene [1]238