İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 468 Hüküm no: 453 Orijinal metin no: [94b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın evinin çatısı üzerine eklediği kirişleri kaldıracağını taahhüt ederek Mehmed Emin Ağa b. Hüseyin ile sulh oldukları Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen zikri âtî husûsun mahallinde keşf ve tahkīki içün savb-ı şer‘-i enverden me’zûnen irsâl olunan Kâtib es-Seyyid Hâfız Ahmed Rızâ Efendi dâ‘îleri hâssa mimarı hulefâsından es-Seyyid Salih ve el-Hâc Mehmed Sâdık halîfeler ile İstanbul’da Süleymâniye kurbünde Taştekneler nâm mahalde [95a] Sarıbâyezid Mahallesi’nde vâki‘ bir tarafdan Bezzâzistanî İbrahim Ağa menzili ve bir tarafdan Parmaklıklı Ali Ağa menzili ve bir tarafdan yine Parmaklıklı el-Hâc İbrahim Ağa menzili ve bir tarafdan tarîk-i âm ile mahdûd ebniyesi mülk ve bahçesi nezâret-i dâ‘îlerinde olan evkāfdan merhûm Sarıbâyezid Vakfı müsakkafâtından bir bâb menzile varup cerîdede mazbûtü’l-esâmî Müslimîn huzûrlarında akd-i meclis-i şer‘-i âlî ettikte menzil-i mezkûra müstakillen mutasarrıf olan sâhib-i arzuhâl es-Seyyid el-Hâc Mehmed Emin Ağa b. es-Seyyid Hüseyin nâm kimesne meclis-i ma‘kūd-ı mezkûrda menzil-i mezkûr ve arasında kâin arsası câmi‘-i şerîf-i merkūm vakfına mukāta‘a-i ma‘lûmeli bir tarafdan Sabuncu Hâfız Mehmed’in veresesi menzili ve bir tarafdan Parmaklıklı Ali Ağa menzili ve bir tarafdan Câbîzâde Ali Efendi menzili ve bir tarafdan ba‘zan câmi‘-i şerîf-i merkūm ve ba‘zan tarîk-i âm ile mahdûd bir bâb menzile müstakillen mutasarrıf ve mâlik olan derûn-ı arzuhâlde mezkûrü’l-ism merkūm Parmaklıklı İbrahim Ağa b. Mehmed nâm kimesne muvâcehesinde câmi‘-i şerîf-mezkûrun imâmı ve vakf-ı merkūmun bi’l-meşrûta mütevellîsi el-Hâc Ali Efendi b. Süleyman nâm kimesne hâzır olduğu hâlde mezbûr el-Hâc İbrahim Ağa’nın ber-vech-i muharrer mutasarrıf olduğu menzilinin bahçesinde köşede kâin kadîm bir bâb kârgîr odasının mimârân-ı mezbûrân mesâhalarıyla tûlen on zirâ‘ çatısının üzerine müceddeden vaz‘ eylediği işbu mu‘âyene olunan dokuz aded kirişlerini verasında kâin benim menzil-i mezkûrumun oda çatısının kalkanlarına mıhlayıp ol vechile benim menzil-i mezkûrumun odasına mazarrâtı olmağla def‘a el-Hâc İbrahim Ağa’ya tenbîh olunmak matlûbumdur deyü da‘vâya tasaddî etmişdim el-hâletü hâzihî muslihûn tavassutuyla beynimiz tevfîk ve ıslâh olunup mezbûr el-Hâc İbrahim Ağa rızâsıyla mârru’z--zikr kârgîr odanın çatısı üzerine müceddeden vaz‘ eylediği kirişlerini kat‘-birle kendi duvarı üzerine müceddeden kalkan vaz‘ıyla zarârını def‘a ta‘ahhüd edüp bu vechile kat‘-ı münâza‘a eyledik deyü ikrâr ve tasdîklerini kâtib-i mezbûr mahallinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelüp alâ-vukū‘ihi inhâ ve takrîr eylediği İstanbul Mahkemesi’nden [huzûr-ı âlîlerine i‘lâm olundu.] Fî 21 S sene [1]238