İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 469 Hüküm no: 454 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esma Nasrâniye’nin, Kaspar v. Mıgırdıç ve Agob v. İstefan aleyhine açtığı tülbentçi dükkânı davasında iddiasını ispat edemediğinden muarazadan men edildiği Çarşı-yı Kebîr’de kalpakçılar başında sorguççular hanı karşısında mukaddemâ kapamacı ve hâlâ tülbentçi dükkânı nizâ‘ına dâir Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı mülûkâneye takdîm olunan işbu arzuhâlde mersûmetü’l-ism olup mahmiye-i İstanbul’da Kumkapı kurbünde Tavâşî Süleyman Ağa Mahallesi’nde mütemekkine iken bundan akdem hâlike olan Margarid bt. Ohannes nâm Nasrâniyenin verâseti sadrî kebîr oğlu Hirebet ve kebîre kızları Zîba ve Esma Nasrâniyelere ba‘de’l-inhisâr sâhibe-i arzuhâl şahsı mu‘arrefe mersûme Esma Nasrâniye Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde derûn-ı arzuhâlde ismi mastûr Agob v. İstefan zimmî muvâcehesinde hâlâ dülbentçiler kethüdâsı Mehmed Derviş Ağa b. el-Hâc İbrahim ile kezâlik derûn-ı arzuhâlde ismi mastûr Kaspar v. Mıgırdıç zimmî hâzır oldukları hâlde mahmiye-i mezbûrede Çarşı-yı Kebîr’de kalpakçılar başında sorguççular hanı karşısında olan sokakta vâki‘ bir tarafdan tülbentçi ve bir tarafdan kazzâz dükkânları beynlerinde köşede vâki‘ iki kepenkli mukaddemâ kapamacı ve hâlâ tülbentçi dükkânı olan bir bâb dükkân derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme anam hâlike-i mesfûre Margarid Nasrâniyenin sağlığında yedinde mâlı ve mülkü olup otuz bin guruş semen-i misli var iken mesfûrân Agob ve Kaspar zimmîler anam mersûmeyi tağrîr ve iğfâl-birle semen-i mislinden noksan-ı fâhiş olan on dört bin guruşa yedinden iştirâ etmeleriyle medfû‘ları olan semen-i merkūmdan hisseme isâbet eden mikdâr-ı ma‘lûmu mesfûrâna red ile âlât-ı mezkûreden hisse-i ma‘lûmemi istirdâd ederim deyü ba‘de’d-da‘vâ ve’l-istintak mesfûr Agob dahi cevâbında âlât-ı lâzıme-i mezkûreye vaz‘-ı yedini ve hâlike-i mesfûrenin sağlığında mukaddemâ mâlı ve mülkü olduğunu ikrâr lâkin hâlike-i mersûme Margarid bt. Ohannes v. Atam nâm Nasrâniye sağlığında bin iki yüz yirmi dokuz senesi Zilhiccesi’nin yirmi beşinci günü târihiyle müverraha ol târihde İstanbul kādısı olup hâlâ bi’l-fi‘il Rumeli Kazaskeri olan Halil Hâmid Paşazâde fazîletlü semâhatlü Mehmed Ârif Efendi hazretlerinin imzâ ve hatmini hâviye işbu yedimde olan bir kıt‘a hüccet-i şer‘iyye nâtıka olduğu üzere âlât-ı lâzıme-i mezkûreyi yedinde mâlı ve mülkü iken tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin semen-i misli olan on dört bin yedi yüz elli guruş semen-i makbûza işbu hâzır-ı mezbûr dülbentçiler Kethüdâsı Mehmed Derviş Ağa’ya bey‘ ve temlîk ve teslîm ol dahi ba‘de’l-iştirâ ve’l-kabûl tağrîr ve gabnine müte‘allika âmme-i da‘vâdan tarafeynden her biri âharın zimmetini kabûlü hâvî ibrâ ve iskāt edüp [95b] ol vechile âlât-ı mezkûre hâzır-ı mezbûr Mehmed Derviş Ağa’nın mülk-i müşterâsı oldukdan sonra mezbûr Mehmed Derviş Ağa dahi bin iki yüz otuz senesi Muharremi’l-harâmının sekizinci günü târihiyle muvarraha ve ol târihde askerî kassâmı olan İstanbul kādısı esbak Moravîzâde Fazîletlü Mehmed Hâmid Efendi’nin imzâ ve hatmini hâviye işbu yedimde olan diğer bir kıt‘a hüccet-i şer‘iyye mantûkunca âlât-ı lâzıme-i mezkûreyi yedinde mâlı iken kezâlik tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin ba‘de’l-müzâyede ve inkitâ‘i’r-rağbe semen-i misli idüğü bi’l-ihbâr mütehakkık olan on dört bin yedi yüz elli guruş semen-i makbûza benimle gāib ani’l-meclis Ohannes v. Sekyas nâm zimmîye iştirâken bey‘ ve teslîm biz dahi yedinden ba‘de’l-iştirâ ve’l-kabz tağrîr ve gabnine müte‘allika âmme-i da‘vâdan her birimiz âharın zimmetini kabûlü hâvî ibrâ ve iskāt ettikden sonra mesfûr Ohannes zimmî dahi nısf hisse-i merkūmesini hâzır-ı mersûm Kaspar zimmîye semen-i ma‘lûm ve makbûza bey‘ ve teslîm ol dahi iştirâ ve kabz edüp ol vechile âlât-ı lâzıme-i merkūme benimle hâzır-ı mesfûr Kaspar zimmînin sahîhan mülk-i müşterâmız olmağın müdde‘iye-i mersûme Esma Nasrâniyenin ber-vech-i muharrer tağrîr ve gabn-i fâhiş da‘vâsıyla eylediği istirdâd da‘vâsından külliyen zimmetimiz berîedir deyü müdde‘iye-i mersûme Esma Nasrâniyenin inkârına mukārin mazmûnları takrîr-i meşrûhuna mutâbık iki kıt‘a hüccet-i şer‘iyye ibrâzı ve hâzırân-ı merkūmânın tasdîkleriyle eylediği def‘ini lede’t-tezkiye makbûlü’ş-şehâde idükleri bi’l-ihbâr mütehakkık olup dükkân-ı merkūm âlâtını dahi mahallinde ta‘yîn ve irâe eden tülbentçi es-Seyyid Mustafa Ağa b. Hüseyin ve Mehmed Said Ağa b. İsmail nâm kimesneler şehâdetleriyle ber-nehc-i şer‘î isbât ettikden sonra mesfûre Esma Nasrâniye dâfi‘-i mersûm Agob zimmînin def‘-i meşrûhunu ve mazmûn-ı hüccet-i mezkûreleri tamamen ve tâyi‘aten ikrâr u i‘tirâf dahi etmeğin mûcebiyle müdde‘iye-i mersûme Esma Nasrâniye da‘vâ-yı mezkûresiyle mesfûr Agob ve hâzır-ı mersûm Kaspar zimmîlere bî-vech-i şer‘î mu‘ârazadan men‘ olunduğu İstanbul Mahkemesi’nden huzûr [-ı âlîlerine i‘lâm olundu.] Fî 24 Z sene [1]237