İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 479 Hüküm no: 463 Orijinal metin no: [98a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Viçen v. Serope ile Çiçilya bt. Haçador’un ipekçi dükkânı gediğini Nonya bt. Karabet’e sattıkları Kazzâz dükkânı mübâya‘a ve sûret i‘tâsı Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kazzâz esnâfından Viçen v. Serope nâm zimmî meclis-i şer‘-i enverde kazzâz Toman zevcesi demekle şehire Çiçilya bt. Haçador nâm Nasrâniye tarafından husûs-ı âtîde vekîl olduğu şahsını bilir Agob v. Abraham ve Bedros v. Avakim nâm zimmîler şehâdetleriyle ber-nehc-i şer‘î sâbit olan Yoseb v. Rafail nâm zimmî hâzır olduğu hâlde Nonya bt. Karabet nâm Nasrâniye tarafından husûs-ı âti’l-beyânı tasdîka vekîl-i şer‘îsi Ohannes v. Karabet nâm zimmî muvâcehesinde mahmiye-i mezbûrede Çarşı-yı Kebîr’de kebeciler sûkunda yağlıkçılar vasatında kazzâz Andon ve kazzâz Samyel dükkânları beynlerinde vâki‘ bir kepenk bir bâb kazzâz dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısfı yedimde olan bir kıt‘a sûret mantûkunca benim ve nısf-ı âharı diğer bir kıt‘a sûret mûcebince müvekkile-i mersûme Çiçilya Nasrâniye’nin yedimizde mâlımız ve mülkümüz olmağın ben âlât-ı lâzıme-i mezkûreden akd-i âti’z-zikrin sudûruna değin ber-vech-i muharrer yedimde mâlım olan nısf hisse-i şâyi‘amı iki bin guruşa müvekkile-i mersûme Çiçilya Nasrâniye kezâlik yedinde mâlı olan nısf hisse-i şâyi‘asını üç bin altı yüz guruşa tarafeynden bi’l-îcâb ve’l-kabûl bâtten ve sahîhan bi-safkatin vâhidetin şürût-ı müfsideden ârî müvekkile-i mersûme Nonya Nasrâniye’ye bey‘ ve temlîk ve teslîm eylediğimizde ol dahi ber-vech-i muharrer yedimizden iştirâ ve temellük ve tesellüm ve kabz ve kabûl ve semenleri olan meblağ-ı merkūm iki bin guruşu bana ve meblağ-ı mezbûr üç bin altı yüz guruşu müvekkile-i mesfûre Çiçilya Nasrâniye’ye def‘ ve teslîm eylediğinde biz dahi yedinden her birimiz tamamen ahz ü kabz edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ ba‘d zikr olunan bir kepenk kazzâz dükkânı derûnunda mevcûde gedik tâ‘bir olunur âlât-ı lâzıme-i ma‘lûmede benim ve müvekkile-i mersûme Çiçilya Nasrâniye’nin kat‘â alâka ve medhalimiz kalmayup müvekkile-i mesfûre [98b] Nonya Nasrâniyenin mâl-ı müşterâsı ve hakk-ı sırfı olmuşdur deyü vekîl-i hâzır-ı mersûm Yoseb zimmînin dahi ikrâr ve tasdîkleri kazzâzlar Kethüdâsı Abdüllatif Ağa ve Yiğitbaşı Molla Mehmed ve sâir mazbûtü’l-esâmî kazzâz ustaları hâzır oldukları hâlde ba‘de’l-ikrâr ve’t-tasdîk âlât-ı lâzıme-i mezkûrenin kaleminde mersûm Viçen zimmî ile müvekkile-i mesfûre Çiçilya Nasrâniye üzerlerinde olan kaydı ref‘ ve terkīn ve yedlerinde olan iki kıt‘a atîk sûretleri battâlda hıfz ve müstekilleten müşteriye-i müvekkile-i mesfûre Nonya Nasrâniye üzerine kayd-birle yedine bir kıt‘a sûret i‘tâ olunmak iktizâ eylediği İstanbul Mahkemesi’nden [huzûr-ı âlîlerine i‘lâm olundu.] Fî 3 Ra sene [1]238