İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 479 Hüküm no: 462 Orijinal metin no: [98a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Viçen v. Serope’nin, ipekçi dükkânı gediğini Bedros v. Avakim’e sattığı Kazzâz dükkânı mübâya‘a ve sûret i‘tâsı Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kâin kazzâz esnâfından Viçen v. Serope nâm zimmî meclis-i şer‘-i enverde esnâf-ı merkūmeden Bedros v. Avakim nâm zimmî muvâcehesinde mahmiye-i mezbûrede takyeciler sûkunda vâki‘ tarafeyni yağcı dükkânları beynlerinde kâin bir bâb kazzâz dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme akd-i âti’z-zikrin sudûruna değin bir kıt‘a sûret mantûkunca yedimde mâlım ve mülküm olmağla ben ber-vech-i muahrrer mâlik oduğum âlât-ı lâzıme-i mezkûreyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin şürût-ı müfsideden ârî mesfûr Bedros zimmîye beş bin üç yüz guruş semen-i makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d âlât-ı lâzıme-i mezkûrede benim kat‘â alâka ve medhalim kalmayup mersûm Bedros zimmînin mâl-ı müşterâsı ve hakk-ı sırfı olmuşdur deyü kazzâzlar Kethüdâsı Abdüllatif Ağa ve Yiğitbaşı Molla Mehmed ve sâir mazbûtü’l-esâmî kazzâz ustaları hâzır oldukları hâlde ba‘de’l-ikrâr ve’t-tasdîk âlât-ı lâzıme-i mezkûrenin kaleminde mersûm Viçen zimmî üzerinde olan kaydı ref‘ ve terkīn ve atîk sûreti battâlda hıfz ve mersûm Bedros zimmî üzerine kayd-birle yedine bir kıt‘a sûret i‘tâ olunmak iktizâ eylediği İstanbul Mahkemesi’nden [huzûr-ı âlîlerine i‘lâm olundu.] Fî 3 Ra sene [1]238