İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 481 Hüküm no: 465 Orijinal metin no: [98b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Aras’ın, Mikail v. Agob aleyhine açtığı un değirmeni davasında iddiasını ispat edemediğinden muarazadan men edildiği Sultan Mehmed Câmi‘-i şerîfi civârında Zincirlikapı’da üç horoslu uncu değirmeninin mu‘ârazadan men‘ i‘lâmı Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye arzuhâl takdîm eden uncu esnâfından Haçador v. Aras nâm zimmî derûn-ı arzuhâlde mastûrü’l-ism li-ebeveyn er karındaşı Uncu Ağya zimmî hâzır olduğu hâlde Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde derûn-ı arzuhâlde mersûmü’l-ism Sarraf Mikail v. Agob nâm zimmî muvâcehesinde mahmiye-i İstanbul’da Sultan Mehmed Câmi‘-i şerîfi civârında Nişancı Mehmed Paşa Câmi‘i kurbünde Zincirlikuyu’da vâki‘ ma‘lûmü’l-hudûd üç horoslu bir bâb uncu değirmeni derûnunda mevcûde beyne’l-esnâf gedik tâ‘bir olunur yedimde mâlım olan on iki re’s bârgir ve sâir âlât-ı lâzıme-i ma‘lûmeden sekiz re’s bârgir ve anlara isâbet eden sâir âlât-ı lâzıme-i ma‘lûmemi zahr-ı arzuhâlime derkenâr olunan bir kıt‘a hüccet-i şer‘iyye mantûkunca bin iki yüz otuz altı senesi şehr-i Rebî‘ülâhiri’nin yirmi beşinci günü tarafeynden îcâb ve kabûlü hâvî şürût-ı müfsideden ârî bâtten ve sahîhan safka-i vâhide ile mersûm Mikail zimmîye sekiz bin guruş semen-i medfû‘ ve makbûza bey‘ ve temlîk ve vech-i lâyıkı üzere teslîm ol dahi ba‘de’l-iştirâ ve’l-kabz tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi edüp ol vechile âlât-ı lâzıme-i mezkûreden ber-i‘tibâr merkūm sekiz re’s bârgir ve onlara isaber eden sâir âlât-ı lâzımede benim kat‘â alâka ve medhalim kalmayup mersûm Mikail zimmînin mâl-ı müşterâsı ve hakk-ı sırfı olduğunu târih-i mezkûrda huzûr-ı hâkimi’ş-şer‘de bi’l-muvâcehe kat‘iyyen ikrâr ve tasdîk ve hüccet-i şer‘iyye-i mezkûreyi mesfûr Mikail zimmî yedine i‘tâ eylediğimden sonra bin iki yüz otuz yedi senesi Zilka‘deti’ş-şerîfesi’nin yirmi beşinci günü ile müverrah kezâlik derkenârda muharrer hâmiş-i hüccetde zikr olunduğu üzere ben âlât-ı lâzıme-i mezkûreden zikr olunan sekiz re’s bârgir ve onlara isâbet eden sâir âlât-ı lâzımemi hüccet-i mezkûrede tahrîr olunduğu üzere sekiz bin guruş semen-i makbûza tarafeynden bi’l-îcâb ve’l-kabûl bâtten ve sahîhan mesfûr Mikail zimmîye bey‘ ve temlîk ve teslîm ol dahi iştirâ ve kabz ve tağrîr ve gabnine müte‘allika da‘vâdan her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt edüp ol vechile âlât-ı mezkûreden sekiz re’s bârgir ve onlara isâbet eden sâir âlât-ı lâzıme-i ma‘lûmede benim kat‘â alâka ve medhalim kalmadığını ve sâlifü’z-zikr üç horoslu uncu değirmeni âlât-ı lâzımesinden yedimde ibkā eylediğim dört re’s bârgir ve onlara isâbet eden sâir âlât-ı lâzıme-i ma‘lûmemi dahi karındaşım hâzır-ı mersûm Uncu Ağya zimmîye semen-i ma‘lûm ve makbûza tarafeynden bi’l-îcâb ve’l-kabûl bâtten ve sahîhan bey‘ ve temlîk ve teslîm ol dahi iştirâ ve kabz etmekle zikr olunan dört re’s bârgir ve onlara isâbet eden sâir âlât-ı lâzıme-i ma‘lûmede dahi benim kat‘â alâkam kalmayup karındaşım hâzır-ı mersûmun mâlı ve mülkü oldukdan sonra karındaşım hâzır-ı mersûm Ağya zimmî dahi âlât-ı merkūmeden ber-vech-i muharrer yedinde mâlı olan sâlifü’l-beyân dört re’s bârgir ve onlara isâbet eden sâir âlât-ı lâzımesini tarafeynden bi’l-îcâb ve’l-kabûl şürût-ı müfsideden ârî bey‘-i bâtt-ı sahîh-i şer‘î ve safka-i vâhide ile on bin üç yüz guruşa mesfûr Mikail zimmîye bey‘ ve temlîk ol dahi ba‘de’l-iştirâ ve’l-kabz ve’l-kabûl [99a] karındaşım hâzır-ı mersûm Ağya zimmî ile iştirâken kapan-ı dakīk tüccârı ve sâir cihet-i ma‘lûmeden ber-mûceb-i defter-i müfredât on bin üç yüz guruş zimmetimizde sahîhan edâsı vâcib deynimiz olmağla semen-i merkūm on bin üç yüz guruş ile deyn-i mezkûrumuzu ashâbına ceste ceste edâ ve ol vechile semen-i mezkûru îfâ etmek üzere mesfûr Mikail zimmîye karındaşım hâzır-ı mersûm Ağya zimmî emr eylediğinde ol dahi ber-vech-i muharrer edâ-yı düyûn-ı mezkûre ile îfâ-yı semen etmek üzere ta‘ahhüd ve tağrîr ve gabnninden her birimiz âharı kabûlü hâvî ibrâ ve iskāt dahi eylediklerini ben ve karındaşım hâzır-ı mersûm Ağya ve mesfûr Mikail zimmîlerden her birimiz bi’l-muvâcehe kezâlik tekrar huzûr-ı hâkimi’ş-şer‘de kat‘iyyen ikrâr u i‘tirâf edüp mesfûr Mikail zimmînin yedinde olan hüccet-i mezkûre hâmişine tahrîr ve imzâ ettirmişdin lâkin ben mukaddemâ zikr olunan sekiz re’s bârgir ve onlara isâbet eden sâir âlât-ı lâzımemi bin iki yüz otuz altı senesi şehr-i Rebî‘ülâhiri’nin on beşinci günü ile müverrah tarafeynin yedlerimizde olan Ermeniyyü’l-imlâ iki kıt‘a mukāvele tahvîli mantûklarınca zikr olunan sekiz re’s bârgir ve onlara isâbet eden sâir âlât-ı lâzımemi mesfûr Mikail zimmîye yedinden ahz ü kabz eylediğim sekiz bin guruş deynim mukābelesinde bey‘ ve teslîm eder olduğumda târih-i mezkûrdan bir sene tamamında edâ-yı deyn eder isem zikr olunan sekiz bârgir ve onlara isâbet eden sâir âlât-ı lâzıme-i ma‘lûmeyi yine bana bey‘ etmek şartıyla ve eğer bir sene tamamında edâ-yı deyn müyesser olmaz ise kat‘iyyen alâkam kalmayup sahîhan mâlı olmak üzere mesfûr Mikail zimmîye bey‘ edüp târih-i mezkûrdan bir sene tamamında edâ-yı deyn müyesser olmayup zikr olunan otuz altı senesinde ve ba‘dehû otuz yedi senesinde ber-vech-i muharrer karındaşım hâzır-ı mersûm Ağya zimmî sâlifü’l-beyân dört re’s bârgir ve onlara isâbet eden sâir âlât-ı lâzımesini mesfûra bey‘ ettikte ben dahi zikirleri mürûr eden sekiz re’s bârgir ve onlara isâbet eden sâir âlât-ı lâzımemi şürût-ı müfsideden ârî mesfûra semen-i makbûz-ı mezkûra sahîhan bey‘ ve teslîm edüp âlât-ı mezkûrede kat‘an alâkam kalmadığını ikrâr etmişdim ancak şart-ı mezkûr ile bey‘in adem-i sıhhatine binâen zikr olunan sekiz re’s bârgir ve onlara isâbet eden sâir âlât-ı lâzımemi istirdâd ile semen-i mezkûru kendüye red murâd ederim deyü takrîr-i meşrûhu üzere âlât-ı mezkûreden sekiz re’s bârgir ve onlara isâbet eden sâir âlât-ı lâzıme-i ma‘lûmeyi şürût-ı müfsideden ârî bâtten ve sahîhan mesfûr Mikail zimmîye bey‘ ve tağrîr ve gabnine müte‘allika âmme-i da‘vâdan kabûlünü hâvî ibrâ-i âmm-ı sahîh-i şer‘î ile zimmetini ibrâ dahi edüp zikr olunan sekiz re’s bârgir ve onlara isâbet eden sâir âlât-ı lâzımede kat‘â alâkası kalmadığını iki def‘a huzûr-ı hâkimde ikrâr eylediğini karındaşı hâzır-ı mersûm Ağya zimmînin dahi tasdîkiyle hâlâ ikrâr u i‘tirâf eder iken şart-ı mezkûr ile bey‘in adem-i sıhhatine binâen redd-i semen ile istirdâd-ı mebî‘ da‘vâsı mesmû‘a olmadığı mesfûr Haçador zimmîye tefhîm ve da‘vâ-yı mezkûresiyle mersûm Mikail zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr [-ı âlîlerine i‘lâm olundu.] Fî 6 S sene [1]238