İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 483 Hüküm no: 466 Orijinal metin no: [99a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryem bt. Yoseb’in, Armavini bt. Artin aleyhine açtığı davada iddiasını ispat edemediğinden muarazadan men edildiği Zindânkapısında kapamacı dükkânı nizâ‘ına dâir Ma‘rûz[-ı dâ‘î-i devlet-i aliyyeleridir ki] Sâhibe-i arzuhâl şahsı mu‘arrefe Maryem bt. Yoseb nâm Nasrâniye bi’l-ma‘iyye rü’yete memûr Haremeyn-i şerîfeyn müfettişi mevâlî-i izâmdan Hatîbzâde fazîletlü es-Seyyid Mehmed Derviş Efendi dâ‘îleriyle Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde mahmiye-i İstanbul hısnı ebvâbından Zindânkapısı dâhilinde vâki‘ Ayasofya-i Kebîr Vakfı müsakkafâtından şehriye kırk beş akçe icâre-i müecceleli ma‘lûmü’l-hudûd dört kepenk bir bâb kapamacı dükkânına bâ-temessük-ı mütevellî bi’l-icâreteyn mutasarrıfe olan kezâlik şahsı mu‘arrefe Armavini bt. Artin nâm Nasrâniye muvâcehesinde zikr olunan dört kepenk bir bâb kapamacı dükkânı bâ-temessük-ı mütevellî bi’l-icâreteyn mesfûre Armavini Nasrâniye’nin tasarrufunda ve derûnunda mevcûde beyne’l-esnâf kapamacı gediği tâ‘bir olunur âlât-ı lâzıme-i ma‘lûme mu‘teber gedik olmak üzere bâ-hüccet-i şer‘iyye benim yedimde mâlım ve mülküm iken işbu arzuhâlim hâmişinde mastûr dîvân-ı hümâyûn [99b] kaleminden ve teşrifât-ı hümâyûn defterlerinden muhrec derkenârlar mantûklarınca abacı esnâfı dükkânlarının yüz otuz beş adedi bitpazarında ve bodrum hanı kurbünde ve yetmiş bir adedi Zindânkapısı hâric ve dâhilinde ve Odun ve Ayazmakapıları ve Bahçekapısı hâric ve dâhilinde ve otuz adedi Yedikule ve Ayvansarayı ve Karagümrük ve Edirnekapısı’nda ve kırk dört adedi Vezneciler ve Yenikapı ve Kumkapı’da ve yirmi dokuz adedi Mercan sûkunda ve on bir adedi medîne-i Üsküdar’da ve sekiz adedi mahrûse-i Galata’da min-haysü’l-mecmû‘ üç yüz otuz dokuz aded gedikleri mu‘teber dükkânları olmağla kapamacı gediğine dâir kayd bulunmayıp lâkin zikr olunan kapamacı esnâfı bezzâz esnâfına mülhak olduğu teşrifât-ı hümâyûn defterlerinde mastûr ve abacı esnâfına dahi kaba bezzâz esnâfı ıtlâk olunmağla dükkân-ı mezkûrun ber-vech-i muharrer gediği mu‘teber iken mesfûre Armavini Nasrâniye mu‘teber gedik yokdur deyü bi-gayr-ı vech gediğime mümâna‘at etmekle suâl olunup dükkân-ı mezkûru bana îcâr edüp gediğime mümâna‘at etmemek üzere mersûme Armavini Nasrâniye’ye tenbîh olunmak matlûbumdur deyü takrîr-i meşrûhu üzere eylediği gedik da‘vâsı meşrû‘a olmayup derkenârlara dahi nazar olundukta abacı esnâfının nizâmlarına dâir üç yüz otuz dokuz aded dükkânları olup kapamacı gediğine dâir kayd bulunmadığı dîvân-ı hümâyûn kaleminden ve kapamacı esnâfı bezzâz esnâfına mülhak olduğu teşrifât-ı hümâyûn defterlerinden derkenâr olunmuş olup bu sûretde dükkân-ı mezkûrda sarâhaten kapamacı gediği mu‘teber olarak mukayyed olmadığından gayrı ilhâk husûsu dahi cemî‘ esnâfın birbirine mülhak olduğu gedik i‘tibârlarından olmayup ordu ihrâcı ve emsâlinde olduğu ve gedik nizâmının şürûtu aklâm-ı padişâhîden birinde sarâhaten mukayyed olursa kānûnen mu‘teber olup ve illâ şer‘an ve kānûnen mu‘teber olmadığı müdde‘iye-i mersûme Maryem Nasrâniye’ye tefhîm ve husûs-ı mezkûr ile bî-vech-i şer‘î mesfûre Armavini Nasrâniyeye mu‘ârazadan men‘ olunduğundan mâ‘adâ mesfûre Armavini Nasrâniye dahi müdde‘iye-i mersûme Maryem Nasrâniye işbu yedimde olan sene-i sâbıkā Zilhicceti’ş-şerîfesinin yirmi dokuzuncu günü ile müverrah ve müfettiş-i mûmâ-ileyhin hatmini hâvî bir kıt‘a i‘lâm-ı şer‘î mantûkunca husûs-ı mezkûru yine bi-aynihî benden da‘vâ ve sa‘âdetlü Dârü’s-sa‘âdeti’ş-şerîfe ağası huzûrunda murâfa‘a olduğumuzda müdde‘iye-i mersûme Maryem Nasrâniye husûs-ı mezkûr ile kezâlik bî-vech-i şer‘î bana müdâhaleden men‘ olunmuşdu deyü mazmûn-ı takrîr-i meşrûhuna mutâbık ibrâz eylediği bir kıt‘a i‘lâm-ı şer‘î mazmûnunu dahi müdde‘iye-i mersûme Maryem Nasrâniye ikrâr u i‘tirâf etmeğin mûcebiyle müdde‘iye-i mesfûre Maryem Nasrâniye kemâ-fi’s-sâbık bî-vech-i şer‘î mu‘ârazadan men‘ olunduğu İstanbul Mahkemesi’nden [huzûr-ı âlîlerine i‘lâm olundu.] Fî 13 S sene [1]238