İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 487 Hüküm no: 471 Orijinal metin no: [100b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Deli Oseb v. Markos’un tuhafiyeci gediğini Katîk bt. Mesrob’a sattığı Tuhafcı ve fincancı Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kâin tuhafcı ve fincancı esnâfından Deli Oseb v. Markos nâm zimmî meclis-i şer‘-i enverde Katîk bt. Mesrob nâm Nasrâniyenin babası ve tarafından husûs-ı âtîde tasdîka vekîl-i şer‘îsi mersûm Mesrob v. Karabet nâm zimmî muvâcehesinde esnâfımızın otuz üç buçuk pay ile mâlik oldukları elli yedi aded dekâkîn ve mehâzin gediklerinden mahmiye-i mezbûrede Uzunçarşıda çörekçi dükkânı sırasında sokak başında vâki‘ ma‘lûmü’l-hudûd bir bâb tuhafcı ve fincancı dükkân derûnunda mevcûde akd-i âti’z-zikrin sudûruna değin bir kıt‘a sûret mantûkunca yedimde mâlım ve mülküm olan yarım pay ile beyne’l-esnâf gedik tâ‘bir olunur âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin dört bin guruş semen-i makbûza müvekkile-i mersûme Katik Nasrâniye’ye bey‘ ve temlîk eylediğimde ol dahi yedimden iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ ba‘d yarım pay ile dükkân-ı mezkûr derûnunda mevcûde gedik tâ‘bir olunur âlât-ı lâzıme-i ma‘lûmede benim kat‘â alâka ve medhalim kalmayup müvekkile-i mersûme Katik Nasrâniye’nin emvâl-i müşterâsı ve hakk-ı sırfı olmuşdur deyü esnâf-ı mezkûrenin kethüdâ vekîli ve yiğitbaşıları hâzır oldukları hâlde ba‘de’l-ikrâr ve’t-tasdîk zikr olunan yarım pay ile gedik tâ‘bir olunur âlât-ı lâzıme-i ma‘lûmenin kaleminde bâyi‘-i mersûm Deli Oseb zimmî üzerinde olan kayd-ı evveli ref‘ ve terkīn ve atîk sûreti battâlda hıfz ile müşteriye-i müvekkile-i mesfûre Katik Nasrâniye ismine kayd ve şürût-ı nizâmları üzere müceddeden yedine sûret i‘tâ buyrulmak bâbında istid‘â-yı inâyet eyledikleri İstanbul Mahkemesi’nden [huzûr-ı âlîlerine i‘lâm olundu.] Fî 20 Ra sene [1]238 Temmetü’s-sicillü’l-mahfûz