İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 487 Hüküm no: 470 Orijinal metin no: [100b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu’dan İstanbul’a getirilen koyunların kasap esnafına dağıtımı Tevzî‘-i ağnâm Ma‘rûz[-ı dâ‘î-i devlet-i aliyyeleridir ki] İşbu sene-i mübârekede dahi Anadolu cânibinden Âsitâne-i aliyyeye Karaman ağnâmı celb eden Erzurum celebânından Abdülgafur Bey yine Erzurum celebânından Gemalmazoğlu Ömer Bey nâm kimesne hâzır olduğu hâlde meclis-i şer‘-i enverde hâlâ Yedikule kasablar kethüdâsı el-Hâc Hasan Ağa b. el-Hâc Osman muvâcehesinde kasab ustalarından Eğrikapu kethüdâsı ve sâirleri hâzır oldukları hâlde ben ve hâzır-ı mezbûr Gemalmazoğlu Ömer Bey ve refîklerimiz Kösec Ahmed ve Deli Bekir ve Ahmed Ağa ve Deli Molla Mustafa ve Haymanalı el-Hâc Mehmed nâm kimesnelerin bu def‘a Erzurum cânibinden Âsitâne-i aliyyeye sevk ve tesyîr eylediğimiz cem‘an dokuz bin re’s Karaman ağnâmımızın hâlâ hâssa kasabbaşısı dergâh-ı âlî kapıcı başılarından Sa‘âdetlü es-Seyyid el-Hâc Mustafa Ağa’nın inzımâm-ı re’y ve ma‘rifetleriyle lühûmun beher vakıyyesini otuz ikişer paraya ve kuyruğunun beher vakıyyesini elli beşer paraya ve sakatlarını yirmi beşer paraya biz kassabâna vermek kassabân dahi üçer para zammıyla lühûmunun beher vakıyyesini otuz beşer paraya ve kuyruğunun beher vakıyyesini beşer para zammıyla altmışar paraya ibâdullâha bey‘e ve yevm-i tevzî‘den otuz bir gün tamamında yaftalarımızı vermek üzere kethüdâ-yı merkūm ve altmış bir gün tamamında iktizâ eden semenlerini bize edâya kasab esnâfı ta‘ahhüd eylediler deyü ikrâr ve tasdîkleri İstanbul Mahkemesi’nden [huzûr-ı âlîlerine i‘lâm olundu.] Fî 15 Ra sene [1]238