İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 49 Hüküm no: 1 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Ağa b. Mehmed’in borcuna karşılık eskici dükkânı gediğini Mustafa Ağa b. Halil’e rehin bıraktığı İkrâr ve eskici gediği rehni İşbu hüccetde hiç balmumcu gediği yokdur Mahmiye-i İstanbul’da Gedikpaşa civârında Akarçeşme kurbünde Eminsinan mahallesinde sâkin eskici esnâfından Mehmed Emin Ağa b. Mehmed nâm kimesne meclis-i şer‘-i şerîf-i enverde dergâh-ı âlî -dâme mahfûfen bi’l-me‘âlî- dokuzuncu sekbânları ortası nukūd-ı mevkūfesinin mütevellîsi işbu bâ‘isü’l-kitâb Mustafa Ağa b. Halil nâm kimesne mahzarında ikrâr-ı tam ve takrîr-i kelâm edip merkūm Mustafa Ağa mütevellîsi olduğu orta-i merkūme nukūd-ı mevkūfesinden bana dört bin guruş ikrâz ve teslîm ben dahi yedinden iktirâz ve kabz ve umûruma sarfla istihlâk etmemle meblağ-ı merkūm ile semenleri işbu târih-i kitâbdan üç sene tamamına değin müeccel ve mev‘ûd yine mâl-ı vakf-ı merkūmdan mütevellî-i merkūm Mustafa Ağa yedinden iştirâ ve kabz eylediğim üç cild Ankaravî ve Behcet ve Feyzullah Efendi fetâvâları semenlerinden dahi bin sekiz yüz guruş ki cem‘an beş bin sekiz yüz guruş zimmetimde orta-i merkūme içün mütevellî-i mezbûr Mustafa Ağa’ya vâcibü’l-edâ deynim olup mukābelesinde yedimde mâlım ve mülküm olan mahmiye-i İstanbul’da Bitpazarı’nda Parmakkapı’da vâki‘ İbrahim Alemdar ve İsa Alemdar dükkânları beynlerinde kâin bir bâb eskici dükkânı derûnunda mevcûde beyne’l-esnâf gedik ta‘bîr olunur ber-mûceb-i defter-i müfredât âlât-ı lâzıme-i ma‘lûmemi rehn vaz‘ ve mütevellî-i merkūm Mustafa Ağa’ya teslîm eylediğimde ol dahi ber-minvâl-i muharrer yedimden irtihân ve kabz ve kabûl eyledikden sonra yine âlât-ı lâzıme-i ma‘lûme-i mezkûreyi bana i‘âre ve teslîm ben dahi yedinden isti‘âre ve kabz etmemle ol-vechile âlât-ı lâzıme-i ma‘lûme-i mezkûre yedimde âriyetdir dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 4 Za sene 1237. Şühûdü’l-hâl: Eskiciler Kethudâsı es-Seyyid Mahmud Ağa b. Hasan, Yiğitbaşı es-Seyyid Mehmed b. Osman, es-Seyyid Salih b. Mustafa, Molla Ömer b. Ali, es-Seyyid İbrahim Ağa b. Abdullah, Mustafa Alemdar b. Mustafa.