İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 53 Hüküm no: 5 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vaslasa bt. Mihal v. Atam’ın bakkal gediğini Çukadâr Hüseyin Ağa’ya sattığı Bakkāl mübâya‘ası Mahmiye-i İstanbul’da kâin bakkāl esnâfından kendi nefsinden asıl ve zevcesi olup vilâyet-i Anadolu’da Niğde sancağında İncesu kasabasında mütemekkine Vaslasa bt. Mihal v. Atam Nasrâniye tarafından husûs-ı âti’l-beyânda vekîl olduğu şahsını bilir Peredomoz v. Anaştaş ve İsak v. Yagof nâm zimmîler şehâdetleriyle ber-nehc-i şer‘î sâbit olan Poros v. İstefan nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Çukadâr Hüseyin Ağa b. Mustafa nâm kimesne mahzarında bi’l-asâle ve bi’l-vekâle ikrâr-ı tam ve takrîr-i kelâm edip mahmiye-i İstanbul’da Sultan Mehmed Câmi‘-i şerîfi kurbünde Küçükkaraman’da manavlar içinde sebzevâtçı karşısında çörekçi dükkânı ittisâlinde kâin Selâm Çelebi dükkânı demekle ma‘rûf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharların ve on beş sehm hisse-i şâyi‘ası zevcem müvekkile-i mersûme Vaslasa Nasrâniyenin ve kırk beş sehm hisse-i şâyi‘ası benim yedimizde bâ-hüccet-i şer‘iye mâlımız ve mülkümüz olmağın ben ber-minvâl-i muharrer mâlik olduğum kırk beş sehm hisse-i şâyi‘amı dört bin yüz yirmi beş guruşa ve zevcem müvekkile-i mersûmenin kezâlik mâlike olduğu on beş sehm hisse-i şâyi‘asını bin üç yüz yetmiş beş guruşa ki cem‘an beş bin beş yüz guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâ-i sâiremiz izinleriyle merkūm Çukadâr Hüseyin Ağa’ya bi’l-asâle ve bi’l-vekâle bey‘ ve temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ve kabûl ve semeni olan meblağ-ı mecmû‘-ı merkūm beş bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt etmemizle fîmâ-ba‘d zikr olunan altmış sehm hisse-i şâyi‘ada benim ve zevcem müvekkile-i mersûmenin kat‘a alâka ve medhalimiz kalmayup merkūm Çukadâr Hüseyin Ağa’nın emvâl-i müşterâtı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 3 Za sene 1237. Şühûdü’l-hâl: Pazarbaşı Süleyman Ağa b. Ömer, Yazıcı Ahmed Efendi b. el-Hâc Ali, Bölükbaşı Abdi Ağa b. Mehmed, Muhzır Molla Hüseyin ve gayruhum.