İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 52 Hüküm no: 4 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro v. Dimo’nun vârislerinin simitçi ve çörekçi fırını gediğini Mehmed Ağa ve İbrahim Ağa’ya sattıkları Simidci ve çörekçi fırını mübâya‘ası Vilâyet-i Rumeli’nde Kesriye kazâsına tâbi‘ Kilis karyesinde mütemekkin iken bundan akdem hâlik olan simidci ve çörekçi esnâfından Petro v. Dimo zimmînin sulbî kebîr oğulları ve hasren vârisleri Dimitri ve Yorgi ve Yenaki ve Nikola nâm zimmîlerden mesfûrûn Dimitri ve Yorgi ve Yenaki nâm zimmîler meclis-i şer‘-i hatîr-i lâzımü’t-tevkīrde işbu bâ‘isü’l-kitâb çörekçi esnâfının kethudâları İbrahim Ağa ve li-ebeveyn er karındaşı el-Hâc Mehmed Ağa b. Mustafa nâm kimesneler muvâcehelerinde bi’l-verâse ikrâr-ı tam ve takrîr-i kelâm edip mahmiye-i İstanbul’da Langa çeşmesi ittisâlinde ekmekçi fırını karşısında vâki‘ enfiyeci dükkânı ve tarîk-i âm ile mahdûd bir bâb simidci ve çörekçi fırını [2b] derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın ve mâ‘adâ altmış sehm hisse-i şâyi‘ası mûrisimiz babamız hâlik-i mesfûrun ile’l-helâk yedinde mâlı ve mülkü olup ba‘de helâkihî ber-i‘tibâr-ı mezkûr hasren bize mevrûs oldukdan sonra karındaşımız mesfûr Nikola zimmî ber-vech-i muharrer mâlik olduğu on beş sehm hisse-i şâyi‘asını bundan akdem merkūm el-Hâc Mehmed Ağa’ya bâ-hüccet-i şer‘iye bey‘ etmekle el-hâletü hâzihî biz dahi mâ‘adâsı olup akd-i âti’z-zikrin sudûruna değin ber-minvâl-i meşrûh irsen ve iştirâken mâlikleri olduğumuz kırk beş sehm hisse-i şâyi‘amızın otuz sehm hisse-i şâyi‘asını kethudâ-i merkūm İbrahim Ağa’ya üç bin iki yüz otuz üç guruş kırk akçeye ve on beş sehm hisse-i şayi-i âharını merkūm el-Hâc Mehmed Ağa’ya bin altı yüz on altı guruş seksen akçeye ki cem‘an dört bin sekiz yüz elli guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i âharımızın izniyle bey‘ ve temlik ve vech-i lâyıkı üzere teslîm eylediğimizde onlar dahi ber-vech-i mübeyyen iştirâ ve temellük ve tesellüm ve kabz ve kabûl ve semeni olan meblağ-ı mecmû‘-ı merkūm dört bin sekiz yüz elli guruşu benden tamamen def‘ ve teslîm biz dahi yedlerinden bi-kadri’l-hısas bi’t-tamam ve’l-kemâl ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i ma‘lûme-i mezkûrede bizim kat‘a alâka ve medhalimiz kalmayup i‘tibâr-ı merkūm üzere otuz sehmi kethudâ-i merkūm İbrahim Ağa’nın ve on beş sehmi mukaddemâ ve on beş sehmi hâlâ şirâen ki cem‘an otuz sehmi dahi karındaşı mezbûr el-Hâc Mehmed Ağa’nın emvâl-i müşterâtları ve hakk-ı sırfları olmuşdur dediklerinde gıbbe’t-tesâduki’ş-şer‘î mâ-vaka‘a bi’t-taleb ketb olundu. Fî 3 Za sene 1237. Şühûdü’l-hâl: Mercanlı el-Hâc Osman Ağa, Tahtakaleli Mehmed Usta, Atpazarı’nda Gözlemeci İbrahim Usta, Küçükkaraman’da es-Seyyid Ali Usta, Galata Kethudâsı es-Seyyid Ömer Ağa, Yiğitbaşı Mehmed Usta, Galata Yiğitbaşısı Kara Mehmed, Yazıcı Ali Efendi, Muhzır Molla Hüseyin, Muhzır Molla Mahmud.