İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 55 Hüküm no: 7 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agop v. Karabet’in bezzaz gediğini Seyyid Mehmed Şemseddin Molla Efendi’ye sattığı Bezzâz gediği mübâya‘ası Mahmiye-i İstanbul’da Küçük Langa kurbünde Kâtib Kasım mahallesinde mütemekkin kuyumcu esnâfından Agop v. Karabet nâm zimmî meclis-i şer‘-i hatîr-i lâzımü’t-tevkīrde müderrisîn-i kirâm-ı zevi’l-ihtirâmdan işbu bâ‘isü’l-kitâb es-Seyyid Mehmed Şemseddin Molla Efendi necli’l-merhûm Sadr-ı Rum-ı esbak es-Seyyid Mustafa Edib Efendi mahzarında ikrâr-ı tam ve takrîr-i kelâm edip mahmiye-i [İstanbul’da] bezzâzistân-ı atik kurbünde vâki‘ Kiçi Kirkor ve Şalcı Oseb zimmîler dükkânları beynlerinde kâin bir bâb bezzâz dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde emvâlim olan bir minder ve bir endâze ve bir akçe tahtası ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mûmâ-ileyh es-Seyyid Mehmed Şemseddin Molla Efendi’ye yedi bin guruşa bey‘ ü temlik ve teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm yedi bin guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı muharrere-i mezkûrede benim kat‘a alâka ve medhalim kalmayup mûmâ-ileyh es-Seyyid Mehmed Şemseddin Molla Efendi’nin emvâl-i müşterâtı ve hakk-ı sırfı olmuşdur keyfe mâ yeşâ ve yehtâr mâlik ve mutasarrıf olsun dedikde gıbbe[’t-tasdîki’ş-şer‘î mâ-vaka‘a bi’t-taleb ketb olundu.] Fî 10 Za sene 1237. Şühûdü’l-hâl: Muhzırlar Kethudâsı Hafız İsmail Efendi b. Mustafa, Molla Hüseyin b. Yusuf, Muhzır Molla Halil b. Mustafa, Muhzır Molla es-Seyyid Osman b. Ali, Muhzır Molla İsmail b. Ahmed.