İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 55 Hüküm no: 8 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karacalarlı Dayıoğlu Ahmed Usta b. Osman’ın berber gediğini Mustafa Ağa b. Ahmed’e sattığı Berber gediği mübâya‘ası Mahmiye-i İstanbul’da kâin berber esnâfından Karacalarlı Dayıoğlu Ahmed Usta b. Osman nâm kimesne meclis-i şer‘-i şerîf-i enverde yine esnâf-ı mezkûreden işbu bâ‘isü’l-kitâb Mustafa Ağa b. Ahmed mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan mahmiye-i İstanbul’da Tavuk Pazarı kurbünde Vezir Hanı karşısında câmeşûycu ve sarrâf dükkânları beynlerinde kâin şehriye yüz on para kadîm kirâlı bir bâb berber dükkânı derûnunda mevcûde Başmuhâsebe Kalemi’nde Karabet zimmî ismine mukayyed beyne’l-esnâf gedik ta‘bîr olunur ber-mûceb-i defter-i müfredât âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Mustafa Ağa’ya bin dört yüz guruşa bey‘ ve temlik ve teslîm eylediğimde ol dahi ber-minvâl-i muharrer yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm bin dört yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan âlât-ı lâzıme-i ma‘lûmede benim kat‘a alâka ve medhalim kalmayup merkūm Mustafa Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 10 Za sene 1237. Şühûdü’l-hâl: Kethudâ vekîli İbrahim Ağa, Şeyh Halil Efendi, Du‘âcı el-Hâc Abdullah, Yiğitbaşı es-Seyyid Mehmed Nuri, Çavuş Mustafa Usta.