İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 56 Hüküm no: 9 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Abdullah’ın kadayıfçı dükkânı gediğini Yusuf Ağa b. Mehmed’e sattığı Kadayıfçı mübâya‘ası gediği Mahmiye-i İstanbul’da Çoban Çavuş Mahallesinde sâkine olup zâtı zeyl-i kitâbda muharrerü’l-esâmî Müslimîn ta‘rîfleriyle mu‘arrefe olan Fatıma bt. Abdullah nâm hatun meclis-i şer‘-i şerîf-i enverde hâlâ zevci işbu bâ‘isü’l-kitâb Kadayıfçı Yusuf Ağa b. Mehmed nâm kimesne mahzarında ikrâr-ı tam ve takrîr-i kelâm edip mahmiye-i İstanbul’da Sultan Bâyezid Hân-ı Veli -âmelehullâhu te‘âlâ bi-lutfihi’l-hafî ve’l-celî- câmi‘-i şerîfi havlısının buğdaycılar kapısında vâki‘ ma‘lûmü’l-hudûd bir bâb kadayıfçı dükkânı derûnunda mevcûde beyne’l-hıref gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir terâzî ma‘a derâhim ve bir kebîr sini ve iki kadayıf sitili ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile zevcim merkūm Yusuf Ağa’ya üç bin guruşa bey‘ ü temlik ve teslîm eylediğimde ol dahi ber-minvâl-i muharrer yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî [3b] ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup zevcim merkūm Yusuf Ağa’nın mâl-ı müşterâsı ve hakk-ı sırfı olmuşdur dedikde gıbbe ‘t-tasdîki’ş-şer‘î mâ-vaka‘a bi’t-taleb ketb olundu. Fî 11 Za sene 1237. Şühûdü’l-hâl: Çörekçiler Kethudâsı İbrahim Ağa b. Mustafa, Yiğitbaşı Mehmed Usta b. Osman, Yazıcı Ali Efendi b. Süleyman, Kadayıfçı Şehzâdeli el-Hâc Ali b. Ahmed, Darbhâne-i atik kurbünde Kadayıfçı Ali Usta b. Abdullah, Irgatpazarlı İsmail Usta b. Zekeriya, Küçükkaramanlı Mehmed Usta b. Ahmed.