İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 59 Hüküm no: 12 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristo v. Toman’ın bakkal dükkânı gediğini Seyyid Hüseyin Beşe b. Seyyid İbrahim’e sattığı 500 guruşa bakkāl dükkânı Mahmiye-i İstanbul’da kâin bakkāl esnâfından Hıristo v. Toman nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb es-Seyyid Hüseyin Beşe b. es-Seyyid İbrahim nâm kimesne mahzarında ikrâr-ı tam ve takrîr-i kelâm edip mahmiye-i İstanbul’da Kumkapı Nişânca’sında vâki‘ İbrahim Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle doksan sehmi âharın ve mâ‘adâ otuz sehm hisse-i şâyi‘ası akd-i âti’z-zikrin sudûruna değin benim yedimde mâlım ve mülküm olmağla ben ber-minvâl-i muharrer mâlik olduğum otuz sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile ve şerîk-i âharın izin ve icâzetiyle merkūm es-Seyyid Hüseyin Beşe’ye beş yüz guruşa bey‘ ü temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan otuz sehm hisse-i şâyi‘ada benim kat‘a alâka ve medhalim kalmayup merkūm es-Seyyid Hüseyin Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 10 Za sene 1237. Şühûdü’l-hâl: Pazarbaşı Süleyman Ağa, Yazıcı Ahmed Efendi, Bölükbaşı Abdi.