İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 62 Hüküm no: 14 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Duhânî Nikola v. Abdala’nın mâlik olduğu sandalcı destgâhını Seyyid Receb b. Ebubekir’e sattığı Sandalcı Hudâvendigâr-ı esbak cennet-mekân firdevs-âşiyân merhûm Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye ve bilâd-ı selâse ve tevâbi‘lerinde vâki‘ bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde takrîr ü tahrîr ve bir aded destgâh iki yüz guruşdan ziyâde semen ile bey‘ ü şirâ olunmak bâ-emr-i âlî memnû‘ olduğu şurût-ı mer‘iyesinden olduğuna binâen sandalcı esnâfından üç aded destgâha mâlik olan Duhânî Nikola v. Abdala nâm zimmî meclis-i şer‘-i şerîf-i enverde esnâf-ı mezkûre mülâzım kalfalarından işbu bâ‘isü’l-kitâb es-Seyyid Receb b. Ebûbekir mahzarında ikrâr-ı tam ve takrîr-i kelâm edip bâlâda zikr ve beyân olunan destgâhlardan akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan üç aded destgâhımın bir adedini yedimde ibkā ve bir adedini işbu meclis-i şer‘de bâ-hüccet-i şer‘iye âhara bey‘ etmemle mâ‘adâ bir adedini dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mersûm Artin zimmîye iki yüz guruşa bey‘ ve temlik ve teslîm eylediğimde ol dahi ber-minvâl-i muharrer yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine [4b] müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan bir aded destgâhda benim kat‘a alâka ve medhalim kalmayup merkūm es-Seyyid Receb’in mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 17 Za sene [1]237. [Şühûdü’l-hâl:] Kethudâ es-Seyyid el-Hâc Hafız Mehmed Emin Ağa, Yiğitbaşı Ebûbekir Ağa, Ali Usta b. Hasan.