.:: İstanbul Kadı Sicilleri ::.


İstanbul Mahkemesi 138 Numaralı Sicil (H.1237-1238 / M. 1821-1822)
cilt: 87, sayfa: 67
Hüküm no: 20
Orijinal metin no: [5a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Simyon v. Yorgi’nin bakkal dükkânı gediğini İstavri v. Yuvan’a sattığı

Bakkāl mübâya‘ası

Mahmiye-i İstanbul’da kâin bakkāl esnâfından Simyon v. Yorgi nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm İstavri v. Yuvan nâm zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Fenerkapısı dâhilinde kolluk ittisâlinde vâki‘ Süzücü dükkânı demekle ma‘rûf ma‘lûmü’l-hudûd bir bâb bakkāl dükkânı ile yine mahâll-i merkūmda Helvacı kapısı ittisâlinde kâin Parmaksız dükkânı demekle ma‘rûf ma‘lûmü’l-hudûd diğer bir bâb bakkāl dükkânının her birinin derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerinin her birinin yüz yirmişer sehm i‘tibâriyle yüz beş sehmleri âharların ve mâ‘adâ on beşer sehmleri benim yedimde mâlım ve mülküm olmağla ben âlât-ı lâzıme-i mezkûrelerin her birinden ber-i‘tibâr-ı merkūm akd-i âti’z-zikrin sudûruna değin yedimde mâlım ve mülküm olan on beşer sehm hisse-i şâyi‘amı âhar şerîklerim izin ve icâzetleriyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr İstavri zimmîye dört bin üç yüz elli guruşa bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm dört bin üç yüz elli guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt dahi etmemizle fîmâ-ba‘d zikr olunan bakkāl dükkânları âlât-ı lâzıme-i ma‘lûmelerinin her birinden i‘tibâr-ı merkūm üzere on beşer sehmlerinde benim kat‘a alâka ve medhalim kalmayup mesfûr İstavri zimmînin emvâl-i müşterâtı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.]

Fî 19 Za sene [1]237.

Şühûdü’l-hâl: Pazarbaşı Süleyman, Bölükbaşı Abdi, Kâtib Ahmed Efendi, İlya v. ( ), Simyon v. ( ), Kābız-ı mâl Simyon v. ( ), Yazıcı Eknaki v. ( ), Çakıroğlu Yorgi v. ( ), Yuvan v. ( ), Lefter v. ( ), Düğenci v. ( ).