İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 69 Hüküm no: 23 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aci Karanfil v. Dimitri’nin mâlik olduğu dört bâb oda ve mağaza gediğini Balmumcu Hasan Ağa b. Abdullah ile ortağı İsmail Ağa’ya sattığı Zindân kapısı dâhilinde sağīr han gediği 1.300 guruşa Mahmiye-i İstanbul’da kâin abacı esnâfından Aci Karanfil v. Dimitri nâm zimmî meclis-i şer‘-i hatîr-i lâzımü’t-tevkīrde işbu bâ‘iseyü’l-kitâb kendi nefsinden asıl ve şerîki İsmail Ağa b. Salih tarafından husûs-ı âti’l-beyânı tasdîka vekîl-i şer‘îsi Balmumcu Hasan Ağa b. Abdullah mahzarında ikrâr-ı tam ve takrîr-i kelâm edip mahmiye-i İstanbul hısnı ebvâbından Zindân kapısı dâhilinde kâin Kulehânı demekle arîf dört bâb oda ve tahtında mağazadan ibâret bir bâb sagīr han derûnunda vâki‘ ancak zikr olunan dört bâb oda derûnlarında mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet [şer‘iye] yedimde emvâlim olan şehriye sekiz guruş kadîm kirâlı âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile asıl-ı merkūm Hasan Ağa ile şerîki müvekkil-i merkūm İsmail Ağa’ya bin üç yüz elli guruşa ale’l-iştirâk bey‘ ve temlik ve teslîm eylediğimde onlar dahi ber-minvâl-i muharrer yedimden iştirâken iştirâ ve temellük ve tesellüm ve kabz ve kabûl ve semeni olan meblağ-ı merkūm bin üç yüz elli guruşu bana def‘ ü teslîm eylediklerinde ben dahi yedlerinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan dört bâb oda derûnlarında mevcûde gedik ta‘bîr olunan âlât-ı lâzıme-i ma‘lûmelerde benim kat‘a alâka ve medhalim kalmayup asıl-ı merkūm Hasan Ağa ve şerîki müvekkil-i mezbûr İsmail Ağa’nın seviyyen müşterâ emvâlleri ve hakk-ı sırfları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 24 Za sene [1]237. Şühûdü’l-hâl: Kethudâ Hafız Mehmed Tâhir Efendi, Yiğitbaşı Ali Ağa, Abacılar Yiğitbaşısı Hafız Mustafa, Balmumcular Kethudâsı Emin Ağa.