İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 70 Hüküm no: 24 Orijinal metin no: [5b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Ömer’in kahve dükkânı gediğini Ömer Beşe b. Hüseyin’e sattığı Kapan-ı dakīk hâricinde kahve gediği Mahmiye-i İstanbul’da Cebb-i Ali kurbünde Muhyiddin Kocavî mahallesinde sâkin buğday döğücü esnâfından Ali Beşe b. Ömer nâm kimesne meclis-i şer‘-i hatîr-i lâzımü’t-tevkīrde dergâh-ı âlî -dâme mahfûfen bi’l-me‘âlî- yeniçerilerinin yirmi beşinci bölük ortası baş kara kollukçusu işbu bâ‘isü’l-kitâb Ömer Beşe b. Hüseyin nâm kimesne mahzarında ikrâr-ı tam ve takrîr-i kelâm edip mahmiye-i mezbûre hısnı ebvâbından Kapan-ı dakīk kapısı hâricinde kolluk sırasında vâki‘ bir tarafdan yemenici dükkânı ve tarafeyni cidâr-ı hısn ve bir tarafı tarîk-i âm ile mahdûd mezbûr Ömer Beşe’nin bi’l-icâreteyn bâ-re’y-i mütevellî mutasarrıf olduğu bir bâb vakıf kahve dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin yedimde mâlım ve mülküm olan iki şerbet güğümü ve beş hurde ve üç kahve ibriği ve bir nühâs mangal ve on taş imâmeli duhan çubuğu ve bir frenk ocağı ve bir fincan tası ve bir maşraba ve on iki fincan ma‘a zarf ve bir çekmece ve sâir kahveci âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bin beş yüz guruşa mezbûr Ömer Beşe’ye bey‘ ü temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin beş yüz guruşu bana def‘ ü teslîm eylediğinde [6a] ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâka ve medhalim kalmayup mezbûr Ömer Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 24 Za sene [1]237. Şühûdü’l-hâl: Karakullukçu Ahmed Beşe b. Mustafa, Karakullukçu İsmail Beşe b. Mehmed, Molla Mahmud b. Mahmud el-Muhzır.