İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 80 Hüküm no: 34 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karoşini bt. Yosof’un bakkal dükkânı gediğini Nefise Hatun bt. İbrahim’e sattığı Bakkāl Mahmiye-i İstanbul’da Ka‘riye Ali Paşa mahallesinde mütemekkine ve şahsı ta‘rîf-i şer‘î ile mu‘arrefe olan Karoşini bt. Yosof nâm Nasrâniye meclis-i şer‘-i şerîf-i enverde zâtı ta‘rîf-i şer‘î ile mu‘arrefe olan işbu bâ‘isetü’l-kitâb Nefise Hatun bt. İbrahim mahzarında ikrâr-ı tam ve takrîr-i kelâm edip mahmiye-i mezbûrede Tekfursarayı kurbünde Molla Aşkī mahallesinde vâki‘ Hacı Hüseyin dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur bir destgâh ve bir kantar ve iki terâzî ma‘a derâhim ve bir çekmece ve sâir âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın ve altmış sehmi benim yedimizde şâyi‘an mâlımız ve mülkümüz olmağın ben âlât-ı lâzıme-i mezkûreden ber-i‘tibâr-ı merkūm akd-i âtiyyü’z-zikrin sudûruna değin yedimde mâlım ve mülküm olan altmış sehm hisse-i şâyi‘a-i mezkûremi şerîk-i âharım izni ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile dört yüz elli guruşa mezbûre Nefise Hatun’a bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı mezbûr dört yüz elli guruşu bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan âlât-ı lâzımenin ber-i‘tibâr-ı merkūm altmış sehm [hisse-i] şâyi‘ında benim kat‘a alâka ve medhalim kalmayup mezbûre Nefise Hatun’un mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 27 Za sene [1]237. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed Efendi.