İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 78 Hüküm no: 33 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçador v. Ersin’in un değirmeni gediğini Sarraf Mikail v. Agop’a sattığı Zincirlikuyu’da değirmen Târih-i asl-ı hüccet fî 25 R sene [12]36. Der-zaman-ı es-Seyyid Mehmed Ebulhayr Derûn-ı hüccetde mastûrü’l-ism uncu esnâfından Haçador v. Ersin nâm zimmî li-ebeveyn er karındaşı Uncu Ağya nâm zimmî hâzır olduğu hâlde meclis-i şer‘-i hatîr-i lâzımü’t-tevkīrde kezâlik derûn-ı hüccetde mersûmü’l-ism işbu bâ‘isü’s-sifr Sarrâf Mikâil v. Agop nâm zimmî muvâcehesinde ikrâr-ı tam ve takrîr-i kelâm edip derûn-ı hüccetde tahrîr olunduğu üzere mahmiye-i İstanbul’da Sultan Mehmed Câmi‘-i şerîfi civârında Nişâncı Mehmed Paşa kurbünde Zincirlikuyu’da vâki‘ bir tarafdan menzil ve bir tarafdan bostan ve iki tarafdan tarîk-i âm ile mahdûd üç horoslu bir bâb uncu değirmeni derûnunda mevcûde olup başmuhâsebe kaleminde kendi ismime mukayyed beyne’l-esnâf gedik ta‘bîr olunur on iki re’s bârgir ve sâir âlât-ı lâzıme-i ma‘lûme mukaddemâ yedimde mâlım ve mülküm iken âlât-ı lâzıme-i mezkûreden derûn-ı hüccetde terkīm olunduğu üzere bir horos dört re’s bârgir ve onlara isâbet eden sâir âlât-ı lâzıme-i ma‘lûmeyi yedimde ibkā ve mâ‘adâ iki horos sekiz re’s bârgir ve onlara isâbet eden sâir âlât-ı lâzıme-i ma‘lûmeyi sekiz bin guruş semen-i makbûza tarafeynden bi’l-îcâb ve’l-kabûl bâtten ve sahîhan mesfûr Sarrâf Mikâil zimmîye bey‘ ü temlik ve teslîm ve tağrîr ve gabnine müte‘allika da‘vâdan her birimiz âharın zimmetini kabûlü hâvî ibrâ ve iskāt edip ol-vechile âlât-ı mezkûreden iki horos sekiz re’s bârgir ve onlara isâbet eden sâir âlât-ı lâzıme-i ma‘lûmede benim kat‘a alâka ve medhalim kalmayup mesfûr Sarrâf Mikâil zimmînin mâl-ı müşterâsı ve hakk-ı sırfı oldukdan sonra yedimde ibkā eylediğim dört re’s bârgir ve onlara isâbet eden sâir âlât-ı lâzıme-i mezkûreyi dahi kezâlik tarafeynden bi’l-îcâb ve’l-kabûl bâtten ve sahîhan karındaşım hâzır-ı mersûm Ağya zimmîye bundan akdem semen-i ma‘lûm ve makbûza bey‘ ü temlik ve teslîm ol dahi iştirâ ve kabz ve kabûl etmekle zikr olunan dört re’s bârgir ve onlara isâbet eden sâir âlât-ı lâzımede dahi benim alâkam olmayıp karındaşım hâzır-ı mersûm Ağya zimmînin mâl-ı müşterâsı olmuş idi el-hâletü hâzihî karındaşım mersûm Ağya zimmî dahi zikr olunan uncu değirmeni âlât-ı lâzımesinden akd-i âti’z-zikrin sudûruna değin ber-vech-i muharrer yedinde mâlı olan bir horos dört re’s bârgir ve onlara isâbet eden sâir âlât-ı lâzıme-i ma‘lûmesini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile on bin üç yüz guruşa yine mesfûr Sarrâf Mikâil zimmîye bey‘ ve temlik ve teslîm ol dahi yedinden iştirâ ve temellük ve tesellüm ve kabz ve kabûl ettikden sonra karındaşım hâzır-ı mesfûr Ağya zimmî ile iştirâken Kapan-ı dakīk tüccârı ve sâire cihet-i ma‘lûmeden ber-mûceb-i defter-i müfredât on bin üç yüz guruş zimmetimizde sahîhan edâsı vâcib deynimiz olmağla semen-i merkūm on bin üç yüz guruş ile deyn-i mezkûrumuzu ashâbına ceste ceste edâ ve ol-vechile semen-i mezkûru îfâ etmek üzere mesfûr Sarrâf Mikâil zimmîye karındaşım hâzır-ı mesfûr emr eylediğinde ol dahi ber-vech-i muharrer edâ-i düyûn-ı mezkûre ile îfâ-i semen-i merkūm etmek üzere ta‘ahhüd ve tağrîr ve gabninden her biri âharı kabûlü hâvî ibrâ dahi eylediği deyü bi’l-cümle [8a] eylediği takrîrini karındaşı hâzır-ı mersûm Ağya ve Sarrâf-ı mesfûr Mikâil zimmîlerden her biri ikrâr ve tasdîk etmeğin mâ-vaka‘a [bi’t-taleb ketb olundu.] Fî 25 Za sene [1]237. Şühûdü’l-hâl: Habbâzân Kethudâsı Mehmed Efendi [b.] Ali, Uncular Kethudâsı el-Hâc Mehmed Ağa [b.] el-Hâc İbrahim Ağa, Yiğitbaşı İbrahim Efendi, Bedirzâde el-Hâc İsmail.