İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 81 Hüküm no: 36 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Dimo’nun bakkal dükkânı gediğini Seyyid Ali Beşe b. Ali’ye sattığı Bakkāl Mahmiye-i İstanbul’da kâin bakkāl esnâfından olup bundan akdem hâlik olan Dimo v. Nikola nâm zimmînin sulbî kebîr oğlu ve hasren vârisi Yorgi nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb es-Seyyid Ali Beşe b. Ali mahzarında ikrâr-ı tam ve takrîr-i kelâm edip mahmiye-i mezbûrede Karagümrük kurbünde Eski Ali Paşa nâm mahâlde kâin Hasan Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle yetmiş dokuz buçuk sehmi âharın ve kırk buçuk sehm hisse-i şâyi‘ası babam hâlik-i mersûm Dimo zimmînin ile’l-helâk yedinde mülkü ve ba‘de helâkihî hasren bana mevrûs olmağla ben âlât-ı lâzıme-i mezkûreden akd-i âti’z-zikrin sudûruna değin ber-i‘tibâr-ı mezkûr irsen mâlik olduğum kırk buçuk sehm hisse-i şâyi‘a-i mezkûremden yirmi sehm ve bir rub‘ sehmini işbu târih-i hüccet günü diğer bir kıt‘a hüccet-i şer‘iye ile semen-i ma‘lûm ve makbûza âhara bey‘ etmemle mâ‘adâ yirmi sehm ve bir rub‘ sehm hisse-i şâyi‘amı dahi tarafeynden îcâb ve kabûlü hâvî [8b] şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izinleriyle merkūm es-Seyyid Ali Beşe’ye beş yüz elli guruşa bi’l-verâse bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş yüz elli guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmede benim kat‘a alâka ve medhalim kalmayup yirmi sehm ve bir rub‘ sehmi merkūm es-Seyyid Ali Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 27 Za sene [1]237. Şühûdü’l-hâl: Eş-şâhidûne’s-sâbıkūn.