İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 82 Hüküm no: 37 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manik v. Vartan’ın habbaz ve değirmen gediğini oğulları Artin ve Sergiz’e sattığı Habbâz ve değirmen gediği Mahmiye-i İstanbul ve bilâd-ı selâse ve tevâbi‘lerinde kâin habbâz esnâfından Azabkapılı Manik v. Vartan nâm zimmî tarafından husûs-ı âti’l-beyânı ikrâra vekîl olduğu esnâf-ı merkūmeden Mirâhorlu Agop v. Toma ve Fındıklılı Mikâil v. İranus nâm zimmîler şehâdetleriyle ber-nehc-i şer‘î sâbit olan Tahtakaleli Filibus v. Ohan nâm zimmî meclis-i şer‘-i hatîr-i lâzımü’t-tevkīrde müvekkil-i mersûmun sulbî kebîr oğulları olup kendi nefsinden asıl ve li-ebeveyn er karındaşı Artin nâm zimmî tarafından husûs-ı âti’l-beyânı tasdîka vekîl-i şer‘îsi işbu bâ‘isü’s-sifr Serkiz nâm zimmî muvâcehesinde bi’l-vekâle ikrâr-ı tam ve takrîr-i kelâm edip müvekkil-i mersûm Manik zimmî mahrûse-i Galata’da Azabkapısı dâhilinde kapı ittisâlinde vâki‘ ma‘lûmü’l-hudûd altı horoslu bir bâb habbâz değirmen ve ona merbût ittisâlinde kâin bir bâb habbâz fırını derûnunda mevcûde yirmi dört re’s bârgir i‘tibâriyle beyne’l-esnâf gedik ta‘bîr olunur âlât-ı lâzıme-i ma‘lûmenin on altı re’s bârgir ve onlara isâbet eden sâir âlât-ı lâzıme-i âharların ve mâ‘adâsı olan sekiz re’s bârgir ve onlara isâbet eden sâir âlât-ı lâzıme-i ma‘lûmesi ve yine mahrûse-i mezkûrede bâb-ı merkūm dâhilinde Çeşmemeydanı nâm mahâlde Yeşildirekli hamam ittisâlinde olan sokakda vâki‘ kezâlik ma‘lûmü’l-hudûd üç horoslu bir bâb uncu değirmeni derûnunda on iki re’s bârgir i‘tibâriyle beyne’l-esnâf gedik ta‘bîr olunur âlât-ı lâzıme-i ma‘lûmesinin sekiz re’s bârgir ve onlara isâbet eden sâir âlât-ı lâzıme-i ma‘lûme kezâlik âharların ve mâ‘adâ dört re’s bârgir ve onlara isâbet eden sâir âlât-ı lâzıme-i ma‘lûmesi akd-i âti’z-zikrin sudûruna değin benim yedimde mâlım ve mülküm olmağla ben zikr olunan habbâz gediği âlât-ı lâzıme-i ma‘lûmesinden ber-vech-i muharrer mâlik olduğum sekiz re’s bârgir ve onlara isâbet eden sâir âlât-ı lâzıme-i ma‘lûmeden dört re’s bârgir ve onlara isâbet eden sâir âlât-ı lâzıme-i ma‘lûme ile sâlifü’z-zikr uncu değirmeni gediği âlât-ı lâzımesinden kezâlik mâlik olduğum dört re’s bârgirden iki re’s bârgir ve onlara isâbet eden sâir âlât-ı lâzıme-i ma‘lûmelerimi üç bin guruşa oğlum müvekkil-i mersûm Artin zimmîye ve yine zikr olunan habbâz gediği âlât-ı lâzımesinden mâ‘adâsı olan dört re’s bârgir ve onlara isâbet eden sâir âlât-ı lâzıme-i ma‘lûme ile mârrü’l-beyân uncu değirmeni gediği âlât-ı lâzıme-i ma‘lûmesinden bâkī iki re’s bârgir ve onlara isâbet eden sâir âlât-ı lâzıme-i ma‘lûmemi yine üç bin guruşa oğlum mersûm Serkiz zimmîye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izinleriyle bey‘ ü temlik ve vech-i lâyıkları üzere teslîm eylediğimde onlar dahi yedimden iştirâ ve temellük ve tesellüm ve kabz ü kabûl ve semenleri olan meblagayn-ı merkūmeyn üçer bin guruşu her biri bana def‘ ü teslîm ben dahi yedlerinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt etmemizle fîmâ-ba‘d zikrleri mürûr eden habbâz değirmeni ve fırın gediğinden dört re’s ve uncu değirmeni gediğinden iki re’s bârgir ve onlara isâbet eden âlât-ı lâzıme-i ma‘lûme oğlum müvekkil-i mersûm Artin zimmînin ve mâ‘adâ habbâz değirmeni ve fırını gediğinden kezâlik dört re’s ve uncu değirmeni gediğinden kezâlik iki re’s bârgir ve onlara isâbet eden sâir âlât-ı lâzıme-i ma‘lûme oğlum mersûm Serkiz zimmînin mâl-ı müşterâları ve hakk-ı sırfları olup benim kat‘a alâka ve medhalim kalmamışdır dedi dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 29 Za sene [1]237. Şühûdü’l-hâl: Ekmekçiler Kethudâsı Mehmed Efendi [b.] Ali, Uncular Kethudâsı el-Hâc Mehmed Ağa [b.] el-Hâc İbrahim, es-Seyyid el-Hâc İbrahim Edhem Efendi b. el-Hâc Eyüb, Mirâhorlu Agop v. Toma, Fındıklılı Mikâil v. İranus, Balıkpazarlı Menas v. Babek, Agop v. Hazer, Melkon v. Artin.