İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 86 Hüküm no: 42 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Yani v. Kosta’nın bakkal dükkânı gediğini Eleniko bt. Dimitri’ye sattığı Bakkāl Mahmiye-i İstanbul’da kâin bakkāl esnâfından Yani v. Kosta nâm zimmî meclis-i şer‘-i hatîr-i lâzımü’t-tevkīrde mahmiye-i mahkiye hısnı ebvâbından Yedikule kapısı dâhilinde Hacı Evhad mahallesinde mütemekkine işbu bâ‘isetü’l-vesîka Eleniko bt. Dimitri nâm Nasrâniyenin zevci ve tarafından husûs-ı âti’l-beyânı tasdîka vekîl-i şer‘îsi Bakkāl Apostol v. Andon nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede mârrü’l-beyân Hacı Evhad mahallesinde vâki‘ Osman Ağa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın ve mâ‘adâ altmış sehmi bâ-hüccet-i şer‘iye benim yedimde mâlım ve mülküm olmağla ben akd-i âti’z-zikrin sudûruna değin i‘tibâr-ı merkūm üzere mâlik olduğum altmış sehm hisse-i şâyi‘a-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i âharım izni ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle müvekkile-i mersûme Eleniko Nasrâniye’ye üç yüz guruşa bey‘ ü temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm üç yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d altmış sehm hisse-i şâyi‘a-i mezkûrede benim kat‘a alâka ve medhalim kalmayup müvekkilim mersûme Eleniko Nasrâniyenin mâl-ı müşterâsı ve hakk-ı sırfı olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu.] Fî 4 Z sene [12]37. Şühûdü’l-hâl: Kâtib Ahmed Efendi, Bölükbaşı Abdi, Pazarbaşı Süleyman Ağa, Çakıroğlu Yorgi, Kābız-ı mâl Simyon, Yazıcı Eftat, Lazari ve gayruhum.