İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 87 Hüküm no: 43 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aksaki bt. Aslan’ın bakkal dükkânı gediğini Hıristo v. Kostandi’ye sattığı Bakkāl Mahmiye-i İstanbul hısnı ebvâbından Balatkapısı hâricinde Köprübaşı nâm mahâlde mütemekkine olup şahsı ta‘rîf-i şer‘î ile mu‘arrefe olan Aksaki bt. Aslan nâm Nasrâniye meclis-i şer‘-i hatîr-i lâzımü’t-tevkīrde sadrî kebîr oğlu işbu bâ‘isü’s-sifr Hıristo v. Kostandi nâm zimmî muvâcehesinde ikrâr-ı tam ve takrîr-i kelâm edip mahmiye-i İstanbul’da Hoca Paşa Câmi‘-i şerîfi kurbünde ekmekçi fırını ittisâlinde vâki‘ Hacı Mustafa dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle doksan sehmi âharın mâ‘adâ otuz sehm hisse-i şâyi‘ası akd-i âti’z-zikrin sudûruna değin bâ-hüccet-i şer‘iye benim yedimde mâlım ve mülküm olmağla ben âlât-ı lâzıme-i mezkûreden i‘tibâr-ı merkūm üzere mâlike olduğum otuz sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i âharım izni ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle oğlum mersûm Hıristo zimmîye beş yüz guruşa bey‘ ü temlik ve vech-i lâyıkı üzere teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d otuz sehm hisse-i şâyi‘a-i mezkûrede benim kat‘a alâka ve medhalim kalmayup oğlum mersûm Hıristo zimmînin mâl-ı müşterâsı ve hakk-ı sırfı olmuşdur dedikde [gıbbe’t-tasdîki’ş-şer‘î mâ-vaka‘a bi’t-taleb ketb olundu.] Fî 6 Z sene [12]37. Şühûdü’l-hâl: Kâtib Ahmed Efendi, Bölükbaşı Abdi, Pazarbaşı Süleyman Ağa, Usta Sava, Çakıroğlu Yorgi, Kābız-ı mâl Simyon, Yazıcı Eftat.