İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 89 Hüküm no: 46 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal esnafından Apostol v. Kiryanos’un bakkal dükkânı gediğini Vasil v. Kiryako’ya sattığı Bakkāl Mahmiye-i İstanbul’da kâin bakkāl esnâfından Apostol v. Kiryanos nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Vasil v. Kiryako nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Kumkapı kurbünde Yalnız Ekmekçi nâm mahâlde kâin isfınahçıbaşı dükkânı demekle ma‘rûf ma‘lûmü’l-hudûd ve bir bâb bakkāl dükkânı derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi işbu hâzır-ı bi’l-meclis Kaya v. Yuvan zimmînin ve otuz sehmi bir kıt‘a hüccet-i şer‘iye mûcebince benim mülk-i müşterâm ve otuz sehmi bundan akdem hâlikler olup hasren vârisleri olduğum sulbî oğullarım İstefan ve Peredemos nâm sagīrlerden mevrûs mâlım olup ol-vechile âlât-ı lâzıme-i mezkûreden akd-i âti’z-zikrin sudûruna değin irsen ve şirâen cem‘an yedimde mâlım ve mülküm olan altmış sehm hisse-i şâyi‘amı şerîkim hâzır-ı mersûmun izin ve icâzeti ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç bin beş yüz guruşa mesfûr Vasil zimmîye bey‘ ve temlik ve vech-i lâyıkı üzere teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ve kabûl ve semeni olan meblağ-ı merkūm üç bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan altmış sehm hisse-i şâyi‘ada benim kat‘a alâka ve medhalim kalmayup mersûm Vasil zimmînin mâl-ı müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 15 Z sene [12]37. Şühûdü’l-hâl: Kâtib Ahmed Efendi, Bölükbaşı Abdi, Pazarbaşı Süleyman Ağa, Döğenci v. ( ), Tekar v. ( ), Çakıroğlu Yorgi, İlya v. ( ), Yazıcı Eftat, Kābız-ı mâl Simyon, Yuvan v. ( ).