İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 89 Hüküm no: 45 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakırcı Mehmed Arif Efendi b. Hacı Osman’ın berber dükkânı gediğini Mıgırdıç v. Serab’a sattığı Berber Mahmiye-i İstanbul’da Kumkapı kurbünde Muhsine Hatun mahallesinde sâkin Bakırcı Mehmed Ârif Efendi b. el-Hâc Osman nâm kimesne meclis-i şer‘-i hatîr-i lâzımü’t-tevkīrde kîseci esnâfından işbu hâmilü’r-rakīm Mıgırdıç v. Serab nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede zikr olunan Kumkapı kurbünde İbrahim Paşa mahallesinde vâki‘ Sadr-ı a‘zam-ı esbak devletlü Hurşid Paşa hazretlerinin mühürdârı efendinin konağı tahtında kâin şehriye beş guruş kirâlı kadîmden beri zimmî berberi iskân eden bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısfı Berber Artin zevcesi Nasrâniyenin ve nısf-ı âharı benim iştirâken yedimizde mâlımız ve mülkümüz olmağla âlât-ı lâzıme-i mezkûreden akd-i âti’z-zikrin sudûruna değin yedimde mâlım ve mülküm olan nısf hisse-i şâyi‘a-i mezkûremi şerîkim mersûmenin izniyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki bin beş yüz guruşa mesfûr Mıgırdıç zimmîye bey‘ ü temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm << bin >> iki bin beş yüz guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûreden nısf hisse-i şâyi‘ada benim kat‘a alâka ve medhalim kalmayup mersûm Mıgırdıç zimmînin mâl-ı müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 15 Z sene [12]37. Şühûdü’l-hâl: Yiğitbaşı es-Seyyid Mehmed Nuri, eş-Şeyh Halil Efendi, Kethudâ vekîli İbrahim Ağa, Du‘âcı el-Hâc Abdullah Efendi, Çavuş Mustafa Ağa, Köşe ustası Süleyman Ağa ve gayruhum.